மாஸ்டர் திரைப்படத்தை தொடர்ந்து இரண்டாவது முறையாக இயக்குநர் லோகேஷ் கனகராஜ் இயக்கத்தில் நடிகர் விஜய் நடித்து வருகிறார். இன்னும் பெயரிடப்படாத இந்த திரைப்படம் தளபதி 67 என அழைக்கப்படுகிறது. மேலும் படப்பிடிப்பு தொடங்கி தற்போது காஷ்மீரில் நடைபெற்று வருகிறது. கடந்த சில நாட்களுக்கு முன் தனி விமானம் மூலம் காஷ்மீர் சென்ற தளபதி 67 படக்குழுவினரின் வீடியோ மற்றும் புகைப்படங்கள் சமூக வலைதளங்களில் வைரலாகியது.
அதனை தொடர்ந்து இந்த படம் குறித்த அப்டேட் கடந்த இரண்டு நாட்களாக தொடர்ந்து வெளியாகி இணையத்தை களக்கி வருகிறது. அதன் படி கடந்த இரண்டு நாட்களுக்கு முன்னர் இந்த படத்தில் நடிக்கும் நடிகர்கள் குறித்து படக்குழு அறிவித்தது, அதில் திரிஷா, இயக்குநர்கள் கௌதம் வாசுதேவ் மேனன் மற்றும் மிஷ்கின், பாலிவுட் நடிகர் சஞ்சய் தத், மலியாள நடிகர் மாத்தீவ் தாமஸ், அர்ஜுன், மன்சூர் அலிகான், நடன இயக்குநர் சாண்டி, பிரியா ஆனந்த் ஆகியோர் நடித்து வருகின்றனர்.
இதன் மூலம் கில்லி, ஆதி, குருவி, திருப்பாச்சி போன்ற படங்களில் நடித்த விஜய் மற்றும் திரிஷா ஜோடி 14 ஆண்டுகளுக்கு பிறகு மீண்டும் இந்த படத்தில் இணைந்துள்ளது, ரசிகர்களை உற்சாகத்தில் ஆழ்த்தியுள்ளது. இந்த அறிவிப்பினை ரசிகர்கள் சமூக வலைதளங்களில் கொண்டாடி வருகின்றனர். மேலும் படத்தின் பூஜையின் போட்டோ மற்றும் வீடியோவையும் படக்குழு வெளியிட்டுள்ளது. இந்த போட்டோ சமூக வலைதளங்களில் வைரலாக பரவி வருகிறது.
இந்நிலையில் தளபதி 67 படத்திற்காக அனிரூத் இசையமைத்துள்ள பாடல்கள் மற்றும் இசை உரிமையை சோனி மியூசிக் நிறுவனம் வாங்கியுள்ளதாக நேற்று படக்குழு அதிகாரப்பூர்வமாக அறிவித்தது. சோனி மியூசிக் சவுத் நிறுவனமும் தனது ட்விட்டர் பக்கத்தில் அதிகாரப்பூர்வமாக அறித்துள்ளது. இந்நிலையில் ஆடியோ உரிமத்தை சோனி மியூசிக் 16 கோடி ரூபாய்க்கு வாங்கியுள்ளதாக தகவல் வெளியாகியுள்ளது. இதற்கு முன்னதாக விஜய் லோகேஷ் கனகராஜ் கூட்டணியில் உருவான ‘மாஸ்டர்’ திரைப்படத்தின் ஆடியோ உரிமையை சோனி நிறுவனம் வைத்துள்ளது குறிப்பிடத்தக்கது.
இதையும் படிங்க:"குரங்கு பொம்மை" இயக்குநர் படத்தில் நடிக்கும் விஜய் சேதுபதி!
