இயக்குநர் கார்த்திக் சுப்புராஜ் தற்போது ஜிகர்தண்டா 2 (jigarthanda 2) படத்தை இயக்கி வருகிறார். இப்படத்தில் ராகவா லாரன்ஸ், எஸ்.ஜே.சூர்யா உள்ளிட்டோர் நடித்து வருகின்றனர். இப்படத்தின் படப்பிடிப்பு தற்போது விறுவிறுப்பாக நடைபெற்று வருகிறது. இந்நிலையில் இப்படத்தில் தனது அனுபவம் குறித்து எஸ்.ஜே.சூர்யா தனது சமூக வலைதளப் பக்கத்தில் பகிர்ந்துள்ளார்.
'ஜிகர்தண்டா 2 படத்திற்காக, ஒரே மூச்சில் 36 நாட்கள் படப்பிடிப்பு நடைபெற்றுள்ளது. என்னவொரு படப்பிடிப்பு. இந்த வாய்ப்பு தந்த கார்த்திக் சுப்புராஜூவிற்கு நன்றி. என்னவொரு போட்டோகிராபி, ராகவா லாரன்ஸ் எப்படிப்பட்ட மனிதர். அருகில் இருந்து நான் பார்த்த அற்புத உள்ளம்' என்று பதிவிட்டுள்ளார். மேலும் இப்படத்தின் படப்பிடிப்பு தளம், இப்படம் சொல்ல வரும் கருத்து, படத்தின் பட்ஜெட் எல்லாமே பிரமாண்டமாக உள்ளதாக அவர் தெரிவித்துள்ளார்.
இந்தப் படத்தில் ஹீரோவாக ராகவா லாரன்ஸ் நடிக்கும் நிலையில், வில்லனாக எஸ்.ஜே. சூர்யா நடிக்கிறார் என்பது குறிப்பிடத்தக்கது. மேலும், இதே நேரத்தில் சங்கர் மற்றும் ராம் சரண் இணையும் RC15 படத்திலும், விஷால் நடிக்கும் மார்க் ஆண்டனி படத்திலும் எஸ். ஜே. சூர்யா நடித்து வருவதால் மிகவும் பிஸியாக உள்ளார். இந்நிலையில், எஸ்.ஜே.சூர்யா, ராகவா லாரன்ஸ் உள்ளிட்டோர் கூட்டணியில் உருவாகி வரும் இப்படத்தை எதிர்நோக்கி ரசிகர்கள் காத்திருக்கின்றனர்.
2014-ல் தயாரிப்பாளர் கதிரேசனின் தயாரிப்பில் கார்த்திக் சுப்புராஜ் இயக்கத்தில் சித்தார்த், லட்சுமி மேனன், பாபி சிம்ஹா உள்ளிட்டப் பலர் நடிப்பில் வெளியாகிய படம், ஜிகர்தண்டா. மதுரையை மையக்களமாக வைத்து உருவான இப்படம் 16 விருதுகளை பெற்றது குறிப்பிடத்தக்கது.