நீண்ட இடைவெளிக்குப் பிறகு தென்னிந்திய படத்தில் நடிக்கும் "ஷில்பா ஷெட்டி"

நீண்ட வருடங்களுக்கு பிறகு தென் இந்திய திரையுலகில் பான் இந்தியா படமாக உருவாகும் கேடி - தி டெவில் படத்தில் பாலிவுட் நடிகை ஷில்பா ஷெட்டி இணைந்துள்ளார்.

சென்னை: தென்னிந்தியாவின் முன்னணி தயாரிப்பு நிறுவனங்களில் ஒன்றான KVN Productions, தங்களது அடுத்த படைப்பான 'KD- The Devil' என்ற படத்தை தயாரித்து வருகிறது. இந்த படத்தின் டைட்டில் மற்றும் டீசர் சமீபத்தில் பெங்களூருவில் பிரமாண்டமாக வெளியிடப்பட்டது. இந்த படத்தில் நடிகர் துருவ் சர்ஜா ஆக்ஷன் நாயகனாக நடித்துள்ளார்.

ஆக்ஷன் கிங் அர்ஜுனின் உறவினரான துருவ் சர்ஜா நடித்த போகரு என்ற திரைப்படம் தமிழில் செம திமிரு என்ற பெயரில் டப் செய்யப்பட்டு வெளியானது. இதனை தொடர்ந்து துருவ் சர்ஜாவுக்கு தமிழிலும் ரசிகர்கள் உருவாகியுள்ளனர். மிகுந்த எதிர்பார்ப்பில் உருவாகி உள்ள ‘கேடி-தி டெவில்’ படம் பான் இந்தியா அளவில் பிரமாண்டமாக வெளியிடப்பட உள்ளது.

இப்படத்தின் அடுத்த அதிரடி அப்டேட்டை தயாரிப்பாளர்கள் வெளியிட்டுள்ளனர். பாலிவுட் பவர் ஹவுஸ் ஸ்டார் ஷில்பா ஷெட்டி இந்த திரைப்படத்தில் சத்யவதி எனும் கதாபாத்திரத்தில் நடித்துள்ளார். இந்த அறிவிப்பு ரசிகர்கள் மத்தியில் பெரும் உற்சாகத்தை ஏற்படுத்தியுள்ளது.

1970-களில் பெங்களூருவில் நடந்த உண்மைச் சம்பவங்களை அடிப்படையாகக் கொண்டு அதிரடி ஆக்‌ஷன் என்டர்டெய்னராக இப்படம் உருவாகிறது. இப்படத்தில் துருவ் சார்ஜாவுடன், ரவிச்சந்திரன், சஞ்சய் தத் மற்றும் ஷில்பா ஷெட்டி குந்த்ரா ஆகிய முன்னணி நட்சத்திரங்களும் இணைந்துள்ளனர். இந்திய அளவில் பிரபலமான முன்னணி நட்சத்திரங்கள் படத்தில் இணைந்திருப்பது, ரசிகர்களிடையே பெரும் ஆர்வத்தைத் தூண்டியுள்ளது.

தமிழில் 1995ஆம் ஆண்டு வெளியான மிஸ்டர் ரோமியோ படத்தில் பிரபுதேவா உடன் இணைந்து நடித்திருந்தார். இதுதான் ஷில்பா ஷெட்டி நடித்த முதல் திரைப்படம் ஆகும். அதனை தொடர்ந்து எஸ்.ஜே. சூர்யா இயக்கத்தில் விஜய் நடித்த குஷி படத்தில் ஒரு பாடலுக்கு நடனம் ஆடியிருந்தார். அதனை தொடர்ந்து தற்போது கேடி படத்தின் மூலம் நீண்ட வருடங்களுக்கு பிறகு பான் இந்தியா நாயகியாக தென் இந்திய படத்தில் நடிக்கிறார்.

இப்படத்தில் நடிப்பது குறித்து நடிகை ஷில்பா ஷெட்டி குந்த்ரா கூறுகையில், “ராஜ்யங்களுக்கு இடையே நடக்கும் ஒரு மாபெரும் போரை பற்றிய கதை தான் கேடி தி டெவில், ஒவ்வொரு ராஜ்யத்திற்கும் ஒரு ‘சத்யவதி’ தேவை. இந்த 'கேடி' போர்க்களத்தில் நானும் ஒரு அதிசக்தி வாய்ந்த கதாப்பாத்திரத்தில் சத்தியவதியாக நடிப்பது மிகப்பெரும் மகிழ்ச்சி" என்றார்.

KVN Productions வழங்கும் KD-The Devil 'கேடி தி டெவில்' படத்தை இயக்குநர் பிரேம் இயக்குகிறார். துருவா சர்ஜா, ரவிச்சந்திரா, சஞ்சய் தத் மற்றும் ஷில்பா ஷெட்டி ஆகியோர் நடித்துள்ளனர். விரைவில் இப்படம் குறித்த அடுத்த கட்ட அறிவிப்பு வெளியாக உள்ளது.

இதையும் படிங்க:விக்ரம் படம் போல் அனைத்து கதாபாத்திரத்திற்கும் முக்கியத்துவம் இருக்கும் - சிம்பு