ஹைதராபாத்: தென்னிந்திய சினிமாவில் முன்னனி நடிகையாக வலம் வருபவர், சமந்தா. தமிழ் மற்றும் தெலுங்கு திரைப்படங்களில் டாப் ஹீரோக்களுக்கு ஜோடியாக நடித்து வரும் சமந்தா, தனக்கென தனி ரசிகர் பட்டாளத்தைக் கொண்டுள்ளார். இந்நிலையில், கடந்த இரண்டு ஆண்டுகளாக கொடுமையான நோயால் பாதிக்கப்பட்டு அதற்கு சிகிச்சை பெற்று வந்த சமந்தா, வெகுநாட்களுக்குப் பின் தனது வாழ்க்கை குறித்து மனம் திறந்து பேட்டியளித்துள்ளார்.
தனியார் பத்திரிகை நிகழ்ச்சி நேர்காணலில், நீங்கள் உங்கள் வாழ்வில் நல்லது, கெட்டது எது நடந்தாலும் ரசிகர்களுடன் பகிர்ந்து கொள்கிறீர்கள், அதற்கான காரணம் என்ன என்று சமந்தாவிடம் கேள்வி எழுப்பினர். அதற்கு, “கடந்த இரண்டு வருடங்களாக நோய் பாதிப்பு, திருமண விவாகரத்து மற்றும் வேலை பாதிக்கப்பட்டு, எப்போதும் இல்லாத அளவிற்கு என் வாழ்வில் சரிவை சந்தித்துள்ளேன். ஆனால், என்னை விட அதிக மடங்கு சிலர் சரிவை சந்தித்து வருகின்றனர்.
அந்த நேரத்தில், என்னை விட சில நடிகை, நடிகர்கள் கடுமையான விமர்சனங்களை எதிர்கொண்டு, உடல்நிலை பாதிக்கப்பட்டு மீண்டு வந்துள்ளனர். அவர்களின் கதைகளை கேட்கும்போது எனக்கு அது பலத்தை தந்து உதவியாக இருந்தது. இங்கு ஒரு நடிகருக்கு, மக்கள் அவர்களது அன்பை கொடுக்கிறார்கள் எனறால், அது விலை மதிக்கத்தக்க பரிசு.