பிரபல இயக்குநர் மணிரத்னம் இயக்கத்தில் ஏ.ஆர். ரஹ்மான் இசையில் பொன்னியின் செல்வன் முதல் பாகம் கடந்த செப்டம்பர் 30ஆம் தேதி வெளியாகி பாக்ஸ் ஆபிஸில் மிகப்பெரும் வெற்றி பெற்றது. மேலும் இப்படத்தை லைகா நிறுவனம் மிகப்பெரும் பட்ஜெட்டில் தயாரித்திருந்தது. இந்த பொன்னியின் செல்வன் முதல் பாகத்தில் விக்ரம், கார்த்தி, ஜெயம் ரவி, த்ரிஷா, ஐஷ்வர்யா ராய், ஜெயராம், பிரகாஷ் ராஜ் உள்ளிட்டப் பலர் நடித்திருந்தனர்.
பொன்னியின் செல்வன் முதல் பாகம் மிகப்பெரும் வெற்றி பெற்றதால் பொன்னியின் செல்வன் இரண்டாம் பாகத்திற்கு ரசிகர்கள் மத்தியில் மிகப்பெரும் எதிர்பார்ப்பு காணப்படுகிறது. பொன்னியின் செல்வன் இரண்டாம் பாகம் வருகின்ற ஏப்ரல் 28ஆம் தேதி வெளியாகும் என படக்குழு ஏற்கனவே அறிவித்துள்ளது.
பொன்னியின் செல்வன் முதல் பாகத்தின் பாடல்கள் மிகப்பெரும் வெற்றி பெற்ற நிலையில் இரண்டாம் பாகத்தின் பாடல்களுக்கு ரசிகர்கள் எதிர்பார்த்து காத்திருந்தனர். இந்நிலையில் பொன்னியின் செல்வன் இரண்டாம் பாகத்தின் முதல் சிங்கிள் 'அக நக' பாடல் இன்று வெளியாகியுள்ளது. இந்தப் பாடலை ஏ.ஆர்.ரஹ்மான் இசையில் சக்திஸ்ரீ கோபாலன் பாடியுள்ளார். மேலும் இந்தப் பாடலை இளங்கோ கிருஷ்ணன் எழுதியுள்ளார்.