சென்னை:ஆர்பி பிலிம்ஸ், ஆர்.பி பாலா தயாரிப்பில், வி.ஆர் துதிவாணன் இயக்கத்தில் கலையரசன், தீபா பாலு முதன்மை வேடங்களில் நடிக்கும் திரைப்படம் 'கொலைச்சேவல்' (kolaiseval). மேலும் தமிழ் சினிமாவில் நல்ல கதையம்சம் கொண்ட கதாபாத்திரங்களை தேர்வு செய்து நடித்து வருபவர் நடிகர் கலையரசன். பா.ரஞ்சித் இயக்கிய பெரும்பாலான படங்களில் இவரது நடிப்பு வெகுவாக கவரும் வகையில் இருக்கும்.
தனி நாயகனாகவும் சில படங்களில் நடித்துள்ளார். அந்த வகையில் கதை நாயகனாக கலையரசன் நடித்துள்ள படம் கொலைச்சேவல். பரபரப்பு நிறைந்த காதல் கதையாக உருவாகியுள்ள 'கொலைச்சேவல்' திரைப்படத்தின் ஃபர்ஸ்ட் லுக்கை இயக்குநர் பா.ரஞ்சித் வெளியிட்டார். ஆர்.பி. பிலிம்ஸ் ஆர் பி பாலா மற்றும் கௌசல்யா பாலா தயாரிக்கும் இரண்டாவது படம்தான் 'கொலைச்சேவல்'.
இப்படத்தின் தலைப்பையும், ஃபர்ஸ்ட் லுக் எனப்படும் முதல் பார்வை போஸ்டரையும் இயக்குநர் பா.ரஞ்சித் இன்று வெளியிட்டார். அறிமுக இயக்குநர் வி.ஆர் துதிவாணன் எழுதி இயக்கும் இத்திரைப்படத்தில் கலையரசன் கதைநாயகனாக நடிக்க, யூடியூப் குறும்படங்கள் புகழ் தீபா பாலு நாயகியாக திரையுலகில் அறிமுகம் ஆகிறார்.
பால சரவணனும் அகரன் வெங்கட்டும் முக்கிய பாத்திரங்களில் நடிக்க, மிகவும் வலுவான எதிர்மறை வேடத்தில் இதுவரை குணச்சித்திர பாத்திரங்களில் நடித்த ஆதவன் நடிக்கிறார். மேலும் கஜராஜ் உள்ளிட்ட பல நடிகர்களும் இப்படத்தில் உள்ளனர்.