"இயக்குநர் அமீரின் நேர்மையை எடை போடும் தகுதி எவருக்கும் இல்லை" - கவிஞர் சினேகன்!

பருத்திவீரன் படப் பிரச்சனையில் இயக்குநர் அமீருக்கு ஆதரவு தெரிவ்க்கும் வகையில் கவிஞர் சினேகன் தனது சமூக வலைதள பக்கத்தில் பதிவிட்டுள்ளார்.

சென்னை: பருத்திவீரன் படப் பிரச்சனை கடந்த சில நாட்களாக சினிமா ரசிகர்கள் மத்தியில் பேசு பொருளாகி வருகிறது. தயாரிப்பாளர் ஞானவேல் ராஜா சமீபத்தில் யூடியுப் சேனல் ஒன்றிற்கு அளித்த பேட்டியில், இயக்குநர் அமீர் பருத்திவீரன் படம் இயக்கிய போது தன்னை ஏமாற்றி பொய் கணக்கு காட்டி பல லட்சங்கள் சம்பாதித்து, ஏமாற்றி விட்டதாகவும், அவர் ஒரு திருடன் எனவும் கூறியிருந்தார்.

இவ்வாறு ஞானவேல் ராஜா பேசிய விவகாரம் தமிழ் சினிமாவில் பெரும் புயலை கிளப்பி உள்ளது. இதற்கு எதிர்ப்பு தெரிவித்து இயக்குநர் அமீர் அறிக்கை வெளியிட்ட நிலையில், அவருக்கு சசிகுமார், சமுத்திரகனி, பொன்வண்ணன் உள்ளிட்டோர் தொடர்ந்து ஆதரவு தெரிவித்து வருகின்றனர்.

இந்நிலையில் கவிஞர் சினேகன் தனது சமூக வலைதள பக்கத்தில் இயக்குநர் அமீருக்கு ஆதரவு தெரிவிக்கும் வகையில் பதிவிட்டு உள்ளார். அவரது பதிவில், "நான் இயக்குனர் அமீரோடு அவரின் முதல் படத்தில் இருந்து இன்று வரை தொடர்ந்து பணியாற்றி வருகிறேன். அவரின் நேர்மையை எடை போட்டு பார்க்கும் தகுதி எவருக்கும் இல்லை.

பருத்தி வீரன் படத்தை முடிப்பதற்கு அவர் எவ்வளவு சிரமத்திற்கு உள்ளானார் என்பது அவரோடு கூட பயணித்த என்னைப் போன்றவர்களுக்கு தான் தெரியும். ஒருவரை விமர்சிப்பதற்கும் அறம் தெரிந்திருக்க வேண்டும்" என்று கூறினார்.

இதையும் படிங்க: "பணத்துக்காக படைப்பிற்கு துரோகம் செய்பவரல்ல அமீர்.." - நடிகர் பொன்வண்ணன்!