சென்னை:இயக்குநர் சிறுத்தை சிவா இயக்கத்தில் சூர்யா நடித்து வரும் திரைப்படம், கங்குவா. தற்போது இந்திய சினிமாவில் 2023 - 2024ஆம் ஆண்டு மிகவும் எதிர்பார்க்கப்படும் படங்களில் ஒன்றாக கங்குவா இருக்கிறது. இப்படத்தில் சூர்யா, திஷா பதானி, யோகி பாபு உள்ளிட்ட பல பிரபலங்கள் நடித்துள்ளனர். கடந்த 2022ஆம் ஆண்டு செப்டம்பரில் வெளியான இந்த படம் குறித்தான அறிவிப்பு, மோஷன் போஸ்டர், வீடியோ என இவை அனைத்தும் படம் மீதான எதிர்பார்ப்பை ரசிகர்களிடையே அதிகரித்துள்ளது.
இப்படத்தை ஸ்டூடியோ கிரீன் ஞானவேல் ராஜா தயாரித்துள்ளார். 'கங்குவா' (kanguva) என்பதன் பொருள் நெருப்பின் சக்தி மற்றும் வலிமையுள்ள வீரன் என்பது ஆகும். இந்த படம் கிட்டத்தட்ட 10 மொழிகளில் 3டி தொழில் நுட்பத்தில் உருவாவதால், அனைத்து தரப்பு ரசிகர்களையும், அனைத்து மாநில மக்களையும் இணைக்கும் வகையிலான தலைப்பாக இது வைக்கப்பட்டுள்ளதாக தெரிவிக்கப்பட்டுள்ளது.
மேலும் வரலாற்றுப் படமாக இப்படம் உருவாகி வருகிறது. அதுமட்டுமின்றி தமிழ், தெலுங்கு, மலையாளம், கன்னடம் என கிட்டத்தட்ட 10 மொழிகளிலும் இப்படம் உருவாகி வருகிறது. ஸ்டூடியோ கிரீன் மற்றும் யுவி கிரியேஷன்ஸ் இணைந்து தயாரித்து வரும் இப்படத்தின் படப்பிடிப்பு கடந்த ஆகஸ்ட் மாதம் தொடங்கியது. தற்போது, படப்பிடிப்பு இறுதிக் கட்டத்தை எட்டியுள்ளது.