'கடைசி மூன்று நிமிடங்களில் திரையரங்கை அதிரவைத்தார் சூர்யா..!' - கமல்ஹாசன்

நடிகர் கமல்ஹாசன் நடிப்பில் சமீபத்தில் வெளியாகிய ‘விக்ரம்’ திரைப்படத்திற்கு பெரும் வரவேற்பளித்த மக்களுக்கு நன்றி தெரிவித்து காணொலி ஒன்றை இணையத்தில் வெளியிட்டுள்ளார், கமல்.

இயக்குநர் லோகேஷ் கனகராஜ் இயக்கத்தில் கமல்ஹாசன், விஜய்சேதுபதி, ஃபகத் ஃபாசில் நடிப்பில் திரையரங்குகளில் வெளியாகி வெற்றி பெற்றிருக்கும் 'விக்ரம்' திரைப்படம் வசூல் ரீதியாகவும் பெரும் சாதனை படைத்து வருகிறது. இந்தப்படத்தில் நடிகர் சூர்யா சிறப்புத் தோற்றத்தில் நடித்துள்ளார். இந்நிலையில், இத்தகைய மாபெரும் வரவேற்பை நல்கிய மக்களுக்கும் படக்குழுவினருக்கும் நன்றி தெரிவிக்கும் வகையில் காணொலி ஒன்றை இணையத்தில் வெளியிட்டுள்ளார், கமல்ஹாசன்.

அந்தக் காணொலியில், ' நல்ல திரைப்படத்தை தாங்கிப் பிடிப்பதை தமிழ் மக்கள் என்றும் தவறியதில்லை. லோகேஷ் கனகராஜ் என் மீதும் சினிமா மீதும் வைத்த அன்பு படப்பிடிப்பின் ஒவ்வொரு நாளும் தெரிந்தது.

இப்படத்தில் நடித்த தம்பிகள் ஃபகத் ஃபாசில், விஜய்சேதுபதி, மற்றும் கடைசி மூன்று நிமிடத்தில் மட்டுமே வந்து திரையரங்குகளை அதிரவைத்த தம்பி சூர்யா இதில் நடித்ததற்கு 'அன்பு' மட்டுமே காரணம். அதற்குக் கைமாறும் செய்யும் படலத்தை அவரை வைத்து நாங்கள் எடுக்கும் அடுத்த படத்தில் காண்பிப்போம். உங்கள் அன்பு தொடர ராஜ் கமல் ஃபிலிம்ஸின் ஊழியனாக உங்கள் நான்’ எனப் பேசினார்.