வேறு வழியின்றி இயக்குநர் ஆகிவிட்டேன் - விஜய் ஆண்டனி!

விஜய் ஆண்டனி இயக்கி நடித்துள்ள பிச்சைக்காரன் 2 படத்தின் செய்தியாளர் சந்திப்பு சென்னையில் நடைபெற்றது. இவ்விழாவில் விஜய் ஆண்டனி உள்ளிட்ட படக்குழுவினர் கலந்து கொண்டனர்.

சென்னை:சசி இயக்கத்தில் வெளியான பிச்சைக்காரன் படம் தமிழ் மட்டுமல்லாமல், தெலுங்கிலும் மிகப்பெரிய வெற்றியைப் பெற்றது. அதனைத்தொடர்ந்து மீண்டும் பிச்சைக்காரன் 2 என்ற படத்தை விஜய் ஆண்டனி இயக்கி நடித்துள்ளார். மூளை மாற்று சிகிச்சை பற்றி பேசும் இப்படம் வருகிற மே 19ஆம் தேதி திரையரங்குகளில் வெளியாகிறது.

விழாவில் பேசிய நடிகர் விஜய் ஆண்டனி கூறும்போது, ''நான் எதிர்பார்க்கவே இல்லை, படம் இயக்குவேன் என்று. இது ஒரு விபத்து தான். முதலில் சசி தான் இப்படத்தை இயக்குவதாக இருந்தது. ஆனால், அவர் வேறு படம் இயக்கி வந்ததால் முடியவில்லை. பின்னர் மற்றொரு இயக்குநரிடம் பேசினோம். ஆனால், அதுவும் நடக்கவில்லை.

பின்னர், வேறு வழியின்றி நானே இயக்கிவிட்டேன். இப்படம் நன்றாக வந்துள்ளதற்கு படக்குழுவினர் தான் காரணம். நல்ல படமாக வந்துள்ளது. அனைவருக்கும் பிடிக்கும். இது ஐந்து மொழிகளில் வெளியாகிறது. நான்கு மொழிகளில் ஒரே நேரத்திலும் இந்தியில் ஒரு வாரம் கழித்தும் வெளியாக உள்ளது. சரியாக 2.30 மணிநேரம் ஓடும். எல்லோரும் சண்டைக்காட்சிகளில் நடிக்கும்போது விபத்தில் சிக்குவார்கள். ஆனால், நான் காதல் காட்சியில் நடிக்கும்போது கீழே விழுந்தேன்.

பிச்சைக்காரன் 2 படக்குழு

லங்காவி தீவில் படப்பிடிப்பு சமயத்தில் மற்ற படகின் மீது மோதி பெரிய விபத்து ஏற்பட்டது. கேமராமேன் வந்த படகின் மீது மோதியதில் மூக்கு, தாடையில் நல்ல காயம் ஏற்பட்டது. சுயநினைவு இன்றி தண்ணீரில் மூழ்கிய என்னை கதாநாயகி உள்ளிட்டோர் காப்பாற்றினர். மருத்துவமனையில் சிகிச்சைப் பெற்று, தற்போது முழு உடல் தகுதியுடன் உள்ளேன். மனதளவிலும் நன்றாக உள்ளேன். இதனைத் தொடர்ந்து பெரிய நடிகர்களை வைத்து படம் இயக்க உள்ளேன். இப்படத்தின் கதை நிறைய பேர் என்னுடையது என்று சொல்கிறார்கள். என்ன செய்வது என்று தெரியவில்லை. இதுவரை 200 படங்கள் இதே கருத்தைக் கொண்டு வந்துள்ளது' என்றார்.