சென்னை: இயக்குநர் சங்கர் இயக்கத்தில் ராம் சரண் நடித்து வரும் புதிய திரைப்படம், கேம் சேஞ்சர் (game changer). இந்த படத்திற்கு இசையமைப்பாளர் தமன் இசையமைக்கிறார். ராம் சரண் நடிக்கும் இந்த படத்தை, ஸ்ரீ வெங்கடேஸ்வரா கிரியேஷன்ஸ் நிறுவனம் தயாரிக்கிறது.
இந்த படத்தில் கியாரா அத்வானி நாயகியாக நடிக்கிறார். இப்படத்தில் ஜெயராம், அஞ்சலி, சுனில், நவீன் சந்திரா, ஸ்ரீகாந்த் ஆகியோர் நடிக்கின்றனர். இப்படம் தமிழ், தெலுங்கு, இந்தி ஆகிய மூன்று மொழிகளில் வெளியாக உள்ளது. முன்னதாக, கடந்த 2021ஆம் ஆண்டு இயக்குநர் சங்கர் இயக்கத்தில் புதிய படத்தில் நடிக்க இருப்பதாக ராம் சரண் தனது "x" தளத்தில் அறிவித்திருந்தார்.
இந்த படம் RC15 மற்றும் SVC50 படமாக முதலில் அறிவிக்கப்பட்டது. அதன்பின், படத்தின் முதற்கட்ட படப்பிடிப்பு ஹைதராபாத்தில் நிறைவடைந்தது என படக்குழு தரப்பில் அறிவிப்பு வெளியானது. பின்னர் கரோனா பரவல் காரணமாக படத்தின் படப்பிடிப்பு தொடங்க முடியவில்லை என படக்குழு தரப்பில் கூறப்பட்டது.