ஒரே பாடலில் 500 நடன கலைஞர்களுக்கு வாய்ப்பளித்த மாவீரன் படக்குழுவுக்கு பாராட்டு

மாவீரன் படத்தின் 'சீன் ஆ சீன் ஆ' பாடலில் 500-க்கும் மேற்பட்ட நடன கலைஞர்களை பயன்படுத்தியதற்காக படக்குழுவினருக்கு நடன இயக்குனர் சங்கம் பாராட்டு தெரிவித்துள்ளது.

சென்னை: பிரின்ஸ் திரைப்படத்துக்கு பிறகு நடிகர் சிவகார்த்திகேயன் மாவீரன் படத்தில் நடித்து வருகிறார். மண்டேலா படத்தின் மூலம் தேசிய விருது பெற்ற இயக்குனர் மடோன் அஸ்வின் இப்படத்தை இயக்கி வருகிறார். இப்படத்தில் சிவகார்த்திகேயனுக்கு ஜோடியாக அதிதி ஷங்கர் நடிக்கிறார்.

மாவீரன் படத்திற்கு பரத் சங்கர் இசை அமைத்துள்ளார். இப்படத்தின் படப்பிடிப்பு விறுவிறுப்பாக நடைபெற்று வருகிறது. இதனிடையே நடிகர் சிவகார்த்திகேயன் பிறந்த நாளை முன்னிட்டு நேற்று (பிப். 17) இப்படத்தின் முதல் பாடலான 'சீன் ஆ சீன் ஆ' என்ற பாடல் வெளியானது.

இந்த 'சீன் ஆ சீன் ஆ' பாடல் ரசிகர்களிடையே வரவேற்பைப் பெற்று வருகிறது. இதில் இடம்பெற்றுள்ள அதிக எண்ணிக்கையிலான நடனக்கலைஞர்கள் பாடலுக்கு முக்கிய சிறப்பம்சமாக உள்ளனர். சென்னையைச் சேர்ந்த 500-க்கும் மேற்பட்ட நடனக் கலைஞர்கள் மற்றும் 150 மேற்பட்ட நடனக் குழுவினர் என்று கிட்டத்தட்ட 1000 பேர் வரை ஆடியுள்ளனர்.

கபிலன் மற்றும் லோகேஷ் எழுதியுள்ள இந்த பாடலுக்கு ஷோபி நடனம் அமைத்துள்ளார். இந்த நிலையில் நடன கலைஞர்கள் சங்க உறுப்பினர்கள் சின்னி பிரகாஷ், பாபு மற்றும் மாரி ஆகியோர் நடிகர் சிவகார்த்திகேயன், இயக்குநர் மடோன் அஸ்வின் மற்றும் தயாரிப்பாளர் அருண் விஸ்வா ஆகியோரை பாராட்டினர்.

சென்னையில் இருந்து முக்கிய நடனக் கலைஞர்கள் மற்றும் நடனக் குழுவினரைப் பயன்படுத்தியதற்காக மாவீரன் படக்குழுவினருக்கு நன்றி தெரிவித்தனர். இந்த 'சீன் ஆ சீன் ஆ' பாடல் எண்ணூரில் பிரம்மாண்டமாக படமாக்கப்பட்டுள்ளது. படத்தின் 80% படப்பிடிப்பு முடிவடைந்துள்ள நிலையில், தற்போது சிவகார்த்திகேயன், மிஷ்கின் மற்றும் சுனில் நடிக்கும் ஸ்டண்ட் காட்சியை படக்குழுவினர் எடுத்து வருகின்றனர்.

இதையும் படிங்க: சாதனைக்கு ஏது வயது..! 'குண்டான் சட்டி' அனிமேஷன் படத்தை உருவாக்கிய தஞ்சை சிறுமி!