சென்னை: நடிகர் அசோக் செல்வன் தமிழ் சினிமாவில் தனித்துவம் மிக்க நடிகராக வலம் வருபவர். த்ரில்லர், காமெடி, காதல் என பல பரிணாமத்தில் தனது நடிப்புத் திறமையை வெளிப்படுத்தி வருகிறார். சமீபத்தில் இவரது நடிப்பில் வெளியான 'சபா நாயகன்' திரைப்படம், ரசிகர்களை வெகுவாக கவர்ந்தது. மேலும், கடந்த ஆண்டுதான் நடிகை கீர்த்தி பாண்டியனை இவர் காதலித்து கரம் பிடித்தார்.
இந்நிலையில், தற்போது இவரது நடிப்பில் 'புளூ ஸ்டார்' என்னும் திரைப்படம் உருவாகியுள்ளது. இப்படத்தில் அசோக் செல்வன் உடன் கீர்த்தி பாண்டியன், சாந்தனு, பிரித்வி, திவ்யா துரைசாமி ஆகியோர் நடித்துள்ளனர். இயக்குநர் பா.ரஞ்சித்திடம் உதவி இயக்குநராக பணியாற்றிய எஸ்.ஜெயகுமார், இந்த படத்தை இயக்கி இருக்கிறார். இப்படத்திற்கு, கோவிந்த் வசந்தா இசையமைக்கிறார். மேலும், தமிழ் அழகன் ஒளிப்பதிவு செய்துள்ளார்.
இந்நிலையில், சமீபத்தில் வெளியான இப்படத்தின் பாடல் ஒன்று, ரசிகர்கள் மத்தியில் நல்ல வரவேற்பைப் பெற்றது. அதைத் தொடர்ந்து, படத்திற்கான எதிர்ப்பார்ப்பு அதிகரித்து வருகிறது. இளைஞர்கள் வாழ்வில் நீங்கா இடம் பிடித்துள்ள கிரிக்கெட் மற்றும் அதைச்சுற்றி நடக்கும் நட்பு, காதல் என்று முழுக்க ஜனரஞ்சகமான படமாக உருவாகி இருக்கிறது, இந்த புளூ ஸ்டார்.