ஹைதராபாத்: பிரபல நடிகர் அல்லு அர்ஜூன் தெலுங்கில் ஆர்யா 2, அலா வைகுண்டபுரம், புஷ்பா உள்ளிட்ட பல படங்களில் நடித்து பிரபலமானவர். தற்போது சுகுமார் இயக்கும் புஷ்பா 2 படத்தில் நடித்து வருகிறார். புஷ்பா 2 படம் அடுத்த ஆண்டு ஆகஸ்ட் 15ஆம் தேதி வெளியாகிறது. இந்த படத்தில் ராஷ்மிகா மந்தனா, ஃபகத் ஃபாசில் உள்ளிட்ட பலர் நடித்து வருகின்றனர்.
இந்த படத்தை மைத்ரி மூவி மேக்கர்ஸ் நிறுவனம் தயாரிக்கிறது. சமீபத்தில் புஷ்பா படத்திற்காக சிறந்த நடிகருக்கான தேசிய விருதை வென்றார். இந்நிலையில் சமீபத்தில் நடிகர் அல்லு அர்ஜூன் இயக்குநர் அட்லீயை மும்பையில் கடந்த வெள்ளியன்று சந்தித்ததாக கூறப்படுகிறது. இருவரும் 2 மணி நேரம் சந்தித்து பேசியதாகவும், புதிய படத்தில் கூட்டணி அமைப்பது குறித்து ஆலோசனை செய்ததாகவும் கூறப்படுகிறது.
இது குறித்து கிடைத்த தகவலின் படி, அல்லு அர்ஜூன் அட்லீயை சந்திப்பதற்காக மும்பை சென்றதாக கூறப்படுகிறது. அட்லீ அல்லு அர்ஜூனை வைத்து இயக்கும் படம் மிகப்பெரிய பட்ஜெட்டில் தயாராகும் என சினிமா வட்டாரங்களில் கூறி வருகின்றனர். தமிழில் ராஜா, ராணி, தெறி, மெர்சல், பிகில் ஆகிய படங்களை இயக்கி பிரபலமடைந்தவர் இயக்குநர் அட்லீ.
ஜவான் படத்தின் வெற்றியின் மூலம் இந்திய அளவில் பிரபல இயக்குநராக தனக்கென தனி இடத்தை பிடித்துள்ளார். உலக பாக்ஸ் ஆபிஸில் ஜவான் திரைப்படம் 1000 கோடி வசூலை நெருங்கி வருகிறது. அவர் அல்லு அர்ஜுனுடன் இணையும் படத்தின் கதை எந்த ஜானரில் இருக்கும் என ரசிகர்கள் எதிர்பார்ப்பில் உள்ளனர்.
இதையும் படிங்க: வசூல் வேட்டையில் பதானை ஓரங்கட்டிய ஜவான்... ரூ.1000 கோடியை நெருங்க இன்னும் இவ்வளவு தான் பாக்கி!
