அமேசான் பிரைம் வீடியோவில் டிசம்பர் 2-ம் தேதி முதல் வெளியாகும் கிரைம் திரில்லர் வலைதள தொடர் 'வதந்தி - தி ஃபேபிள் ஆஃப் வெலோனி'. தமிழ் திரையுலகின் முன்னணி நட்சத்திர இயக்குநர்களான புஷ்கர் - காயத்ரி ஆகியோரின் தயாரிப்பில், இயக்குநர் ஆண்ட்ரூஸ் லூயிஸ் இயக்கியிருக்கும் இத்தொடரில் வெலோனி என்ற கதையின் முதன்மையான வேடத்தில் நடித்திருக்கும் புதுமுகம் யார்? என்பது குறித்து, பார்வையாளர்கள் வியப்புடன் காத்திருக்கிறார்கள். மேலும் தற்போது ரசிகர்களிடத்தில் வெலோனி யார்? என்பதே அவர்களின் மனதில் எழும் ஒற்றை வினா.
இந்த கதாபாத்திரத்தில் சஞ்சனா கிருஷ்ணமூர்த்தி என்ற இளம் பெண் நடித்துள்ளார். இவர் யூட்யூப் நட்சத்திரம். 'ஆஸம் மச்சி' என்ற தமிழ் யூட்யூப் சேனலில் வெளியான ' 90ஸ் கிட்ஸ் லவ் எ 2K கிட்ஸ்' என்ற நிகழ்ச்சி மூலம் புகழ்பெற்றவர். விஷுவல் கம்யூனிகேஷன் பிரிவில் பட்டதாரியான இவர், சிறுகதைகள், கவிதைகள் எழுதுவதில் வல்லவர். ஓவியம் வரைவதிலும் ஆர்வம் கொண்டவர்.
சிறந்த உள்ளடக்கம் கொண்ட நிகழ்ச்சிகளை உருவாக்குவதில் பேரார்வம் கொண்ட சஞ்சனா, முன்னணி திரைப்பட இயக்குநர்களிடம் உதவியாளராக பணியாற்ற விரும்பினார். ஆனால் அவர் 'வதந்தி- தி ஃபேபிள் ஆஃப் வெலோனி'யில் கதையின் நாயகியாக முதன்மையான கதாபாத்திரத்தில் நடிக்க தேர்வாகி, நடிகையாக அறிமுகமாகிறார் .