கணவருக்கு நடிகை பிரனிதா பாத பூஜை: ட்விட்டரில் வறுத்தெடுக்கும் நெட்டிசன்கள்

நடிகை பிரனிதா தனது ட்விட்டர் பக்கத்தில் பதிவிட்ட பதிவு நெட்டிசன்கள் மத்தியில் கடும் விவாதத்திற்குள்ளாகியுள்ளது.

ஆடி அமாவாசையை முன்னிட்டு நடிகை பிரனிதா தனது கணவருக்கு பாதபூஜை செய்து அந்த புகைப்படத்தை தனது ட்விட்டர் பக்கத்தில் பதிவிட்டதையடுத்து, அதன் கீழே அதை ஆதரித்தும், விமர்சித்தும் நெட்டிசன்கள் கருத்து தெரிவித்து வருகின்றனர்.

நடிகை பிரனிதா, கன்னடம், தமிழ், தெலுங்கு, இந்தி ஆகிய மொழித் திரைப்படங்களில் நடித்துள்ளார். குறிப்பாக தமிழில் சகுனி (2012), மாஸ் (2015) ஆகிய திரைப்படங்களில் நடித்துள்ளார். இந்நிலையில், இவர் தற்போது பதிவிட்டுள்ள பதிவு, நெட்டிசன்கள் மத்தியில் வறுத்தெடுக்கப்பட்டு வருகிறது.

ஒரு பக்கம் பெண்ணியவாதிகள் மற்றும் பகுத்தறிவாதிகள், இது பெண்ணடிமைத்தனத்தை ஊக்கவிக்கும், நவீன காலகட்டத்தில் இத்தகைய செயல்கள் எல்லாம் ஏற்புடையதல்ல என்றும் கருத்து தெரிவித்து வருகின்றனர். மறுபக்கம் அடிப்படைவாதிகளும், வலது சாரியினரும் இதை வரவேற்று வருகின்றனர். சனாதன தர்மத்தை கடைபிடிக்கும் நடிகை பிரனிதாவிற்கு ஆதரவும் தெரிவித்து வருகின்றனர்.