சென்னை: தமிழ் சினிமாவில் முன்னணி நடிகராக வலம் வருபவர் நடிகர் சூர்யா. இவரது நடிப்பில் மிகப் பெரிய பட்ஜெட் படமாக உருவாகி வரும் திரைப்படம் கங்குவா. சிறுத்தை சிவா இயத்தில் உருவாகிவரும் இந்த திரைப்படத்தைத் தமிழ், தெலுங்கு, ஆங்கிலம் உள்ளிட்ட 10 மொழிகளில் வெளியிடப் படக்குழு திட்டமிட்டு உள்ளது.
சூர்யாவின் 42வது படமாக உருவாகும் இந்த படத்தில் பாலிவுட் நடிகை திஷா பதானி, யோகிபாபு, ரெடின் கிங்ஸ்லி, கோவை சரளா உள்ளிட்ட நட்சத்திர பட்டாளங்கள் ஏராளமானோர் நடித்துள்ளனர். கங்குவா படத்திற்கு தேவி ஸ்ரீ பிரசாத் இசை அமைத்து வருகிறார். 3டி தொழில் நுட்பத்தில் 10 மொழிகளில் உருவாகும் இந்தப் படத்தில் சூர்யா 5 விதமான தோற்றங்களில் நடிப்பதாகத் தெரிவிக்கப்பட்டு உள்ளது.
ஸ்டூடியோ கிரீன் நிறுவனம் சார்பில் ஞானவேல் ராஜா இப்படத்தைத் தயாரிக்கிறார். இந்த படம் 1000 ஆண்டுகளுக்கு முந்தைய காலகட்டத்தில் நடக்கும் கதையாக உருவாக்கப்பட்டுள்ளது. இதனால், படப்பிடிப்பு முடிந்து விட்டாலும் பேட்ச் ஒர்க் பணிகள் நடந்து வந்தது. இந்த நிலையில், தற்போது படத்தின் வில்லன் பாபி தியோல் உடன் சூர்யா மோதும் காட்சிகளின் பேட்ச் ஒர்க் எடுக்கப்பட்டுள்ளது.