தமிழ்ப் படங்களில் பிஸியான நடிகர் சுனில்

தெலுங்கு நடிகர் சுனில் தமிழ் படங்களில் அடுத்தடுத்து பிஸியாக நடித்து வருகிறார்.

சென்னை: தெலுங்கு திரையுலகின் முன்னணி நகைச்சுவை நடிகர்களில் ஒருவராக இருந்தவர் சுனில். அதன்பின் குணசித்தர நடிகராக உருவெடுத்து ஹீரோவாகவும் நடித்தார். தற்போது வில்லனாக கலக்கி வருகிறார். சமீபத்தில் வெளியான அல்லு அர்ஜுனின் புஷ்பா திரைப்படத்தில் மங்கலம் சீனுவாக மிரட்டியிருந்தார். இயக்குநர் ராஜமௌலி இயக்கிய மரியாதை ராமண்ணா படத்தில் கதை நாயகனாக கலக்கியிருந்தார்.

அப்படம் தமிழில் சந்தானம் நடிப்பில் வல்லவனுக்கு புல்லும் ஆயுதம் என்ற பெயரில் ரீமேக் செய்யப்பட்டது. தற்போது சுனிலுக்கு தமிழ் சினிமாவில் வாய்ப்புகள் குவிந்து வருகின்றன. இயக்குநர் நெல்சன் இயக்கத்தில் ரஜினிகாந்த் நடிக்கும் ஜெயிலர் படத்தில் சுனில் முக்கிய கதாபாத்திரத்தில் நடித்து வருகிறார்.

இதனை படக்குழு அதிகாரப்பூர்வமாக அறிவித்திருந்தது. அதையடுத்து இயக்குநர் ராஜூ முருகன் இயக்கத்தில் கார்த்தி நடிக்கும் ஜப்பான் படத்திலும் நடிக்கிறார். மடோன் அஸ்வின் இயக்கத்தில் சிவகார்த்திகேயன் நடிக்கும் மாவீரன் படத்திலும் சுனில் ஒப்பந்தமாகியுள்ளார். அதோடு ஆதிக் ரவிச்சந்திரன் இயக்கத்தில் விஷால் நடிக்கும் மார்க் ஆண்டனி படத்திலும் சுனில் முக்கிய வேடத்தில் நடிக்கிறார். இப்படி அடுத்தடுத்து தமிழ் படங்களில் பிஸியாக நடிகர் சுனில் நடித்து வருகிறார்.

இதையும் படிங்க:இரட்டை வேடத்தில் கலக்கும் ஜோஜு ஜார்ஜ்.. வெளியானது இரட்டா டிரைலர்..