சென்னை: தமிழ் சினிமாவில் முன்னணி நடிகராக திகழ்பவர் தனுஷ். இவரது நடிப்பில் கடைசியாக வெளியான "வாத்தி" திரைப்படம் கணிசமான வெற்றியைப் பெற்றது. அதனைத் தொடர்ந்து இயக்குநர் அருண் மாதேஸ்வரன் இயக்கத்தில் கேப்டன் மில்லர் திரைப்படத்தில் நடித்து வருகிறார்.
தமிழ் சினிமாவில் தனது மூன்றாவது படத்தை நடிகர் தனுஷை வைத்து இயக்கும் வாய்ப்பு பெற்றவர் அருண் மாதேஸ்வரன். இவர் தனது முதல் படமான 'ராக்கி' படம் அனைவரின் கவனத்தையும் ஈர்த்தது. பின்னர், இயக்குநரும், நடிகருமான செல்வராகவன் நடிப்பில் வெளியான ‘சாணிக்காயிதம்' திரைப்படத்தை இயக்கி தமிழ் சினிமாவில் வெற்றி இயக்குநராக வலம் வந்தவர்.
தற்போது “கேப்டன் மில்லர்” திரைப்படத்தை இயக்கி வருகிறார் என்பது குறிப்பிடத்தக்கது. இந்த திரைப்படத்தை பிரமாண்டமான முறையில் சத்யஜோதி பிலிம்ஸ் நிறுவனம் தயாரித்து வருகிறது. தனுஷ் மற்றும் நடிகை பிரியங்கா மோகன் ஆகியோர் இப்படத்தில் நடிக்கின்றனர். மேலும், இப்படத்தில் தெலுங்கு நடிகர் சந்தீப் கிஷன் முக்கிய கதாபாத்திரத்தில் நடிக்கிறார்.
"கேப்டன் மில்லர்" படத்தில் ஜான் கொக்கன், நிவேதிதா சதீஷ், குமரவேல், டேனியல் பாலாஜி, நாசர், விஜி சந்திரசேகர், சுவயம்சிதா தாஸ், பிந்து, அருணோதயன், "மேற்குத்தொடர்ச்சிமலை" ஆண்டனி, பால சரவணன் மற்றும் சிலர் முக்கிய கதாபாத்திரத்தில் நடித்துள்ளனர். அதுமட்டுமின்றி, இந்தப் படத்தில் கன்னட நடிகர் சிவராஜ்குமார் முக்கிய வேடத்தில் நடித்துள்ளார்.