பட்டப்பகலில் வீடு புகுந்து பெண்ணை தாக்கி நகை கொள்ளை!

ஸ்ரீரங்கம் அருகே பட்டப்பகலில் வீடு புகுந்து பெண்ணை தாக்கி நகையை கொள்ளையடித்து சென்றவர்களை காவல் துறையினர் தேடி வருகின்றனர்.

திருச்சி: திருச்சி, ஸ்ரீரங்கம் - மேலூர் ரோட்டில் உள்ளது லட்சுமி நாராயணன் நகர். இந்தப் பகுதியை சேர்ந்தவர் சிந்துஜா(30). இவர் இன்று பகலில் தன் வீட்டில் சமையல் செய்துகொண்டிருந்தார். அப்போது வீட்டிற்குள் புகுந்த அடையாளம் தெரியாத நபர்கள், சிந்துஜாவை உருட்டுக்கட்டையால் தாக்கினர். இதனால் சிந்துஜா அலறியபடியே மயங்கி விழுந்தார்.

பின்னர், அவர்கள் சிந்துஜா அணிந்திருந்த தாலி சங்கிலி மற்றும் தங்க நகைகளை கொள்ளையடித்துக் கொண்டு சென்றுள்ளனர். சிந்துஜாவின் அலறல் சத்தம் கேட்டு அக்கம் பக்கத்தினர் ஓடிவந்து பார்த்தபோது, சிந்துஜாவை தாக்கிவிட்டு கொள்ளையர்கள் நகையை கொள்ளையடித்து சென்றது தெரியவந்தது.

இந்த சம்பவம் குறித்து, ஸ்ரீரங்கம் காவல் நிலையத்திற்கு தகவல் தெரிவிக்கப்பட்டது. சம்பவ இடத்திற்கு விரைந்து வந்த காவல் துறையினர் வந்து சிந்துஜாவிடம் விசாரணை மேற்கொண்டனர். தொடர்ந்து ஆங்காங்கே காவல் துறையினர் வாகன சோதனையில் ஈடுபட்டனர். கொள்ளையர்கள் தாக்கியதில் காயமடைந்த சிந்துஜா மருத்துவமனையில் சேர்க்கப்பட்டுள்ளார்.

இது தொடர்பாக வழக்குப்பதிவு செய்த காவல் துறையினர், பட்டப்பகலில் வீடு புகுந்து பெண்ணை தாக்கி நகையை கொள்ளையடித்தவர்களை தேடிவருகின்றனர்.

இதையும் படிங்க:உட்கட்சி பூசலில் அதிமுக முன்னாள் கவுன்சிலருக்கு அரிவாள் வெட்டு!