இன்ஸ்டாகிராமில் பள்ளி மாணவியுடன் பழகி ஏமாற்றியவர் கைது

இன்ஸ்டாகிராம் மூலம் பழகிய பள்ளி மாணவியை கடத்திச் சென்ற ஜிம் மாஸ்டரை தர்மபுரி காவல் துறையினர் போக்சோ சட்டத்தின்கீழ் கைதுசெய்தனர்.

தர்மபுரி:திருப்பத்தூர் மாவட்டம், பொம்மிகுப்பம் பகுதியைச் சேர்ந்தவர் நரசிம்மன் (26). ஜிம் மாஸ்டராக பணிபுரியும் இவருக்கு இரண்டு மனைவிகள் உள்ளனர்.

குடும்பத் தகராறு காரணமாக இரண்டு மனைவிகளும் நரசிம்மனை பிரிந்து சென்றனர்.

இந்நிலையில் தர்மபுரி மதிகோன்பாளையத்தைச் சேர்ந்த 15 வயதுடைய 10ஆம் வகுப்பு படித்த மாணவியிடம் நரசிம்மனுக்கு இன்ஸ்டாகிராம் மூலம் பழக்கம் ஏற்பட்டது. இதையடுத்து 2020ஆம் ஆண்டு அக்டோபர் 5ஆம் தேதி பெங்களூருவிலிருந்து நரசிம்மன் மோட்டார் சைக்கிளில் தர்மபுரி வந்துள்ளார்.

தனிப்படை தேடுதல் வேட்டை..

அப்போது திருமணம் செய்வதாக ஆசைவார்த்தைக் கூறி சிறுமியை கடத்திச் சென்றுள்ளார். இதுகுறித்து சிறுமியின் பெற்றோர் தர்மபுரி நகர காவல் நிலையத்தில் புகாரளித்தனர். மேலும், சென்னை உயர் நீதிமன்றத்தில் ஆட்கொணர்வு மனு தாக்கல் செய்தனர்.

இதையடுத்து, நீதிமன்றம் உத்தரவின்படி தர்மபுரி காவல் துணைக் கண்காணிப்பாளரான வினோத், நகர காவல் உதவி ஆய்வாளர் சுந்தரமூர்த்தி தலைமையில் இவர்களைப் பிடிக்க தனிப்படை அமைத்துத் தேடும் பணியைத் தீவிரப்படுத்தினர்.

தனிப்படை சிறுமியின் சமூக வலைத்தள கணக்குகளை ஆய்வு செய்தனர். மேலும் நரசிம்மனின் கைப்பேசி எண்ணைக் கொண்டு அவரை தேடிவந்தனர். 150க்கும் மேற்பட்ட நபர்கள், 50க்கும் மேற்பட்ட சிசிடிவி காட்சிகளை ஆராய்ந்ததில் தெலங்கானா மாநிலம், சங்காரெட்டி மாவட்டத்திலுள்ள இஷ்ணாபூரில் நரசிம்மன் இருப்பது தெரியவந்தது.

போக்சோ சட்டத்தின்கீழ் கைது

போக்சோ சட்டத்தில் கைது

இதனைத் தொடர்ந்து தெலங்கானா சென்ற காவலர்கள் நரசிம்மனை பிடித்து விசாரித்தனர். அந்த விசாரணையில் பள்ளி மாணவியை கேரளா, கர்நாடகா, ஆந்திரா, தெலங்கானா உள்பட ஐந்து மாநிலங்களுக்கு மோட்டார் சைக்கிளிலேயே அவர் கடத்திச் சென்றது தெரியவந்தது.

மேலும், ஆசைவார்த்தைக் கூறி சிறுமியை பலமுறை பாலியல் வன்புணர்வு செய்ததும், தற்போது மாணவிக்கு 8 மாத ஆண் குழந்தை இருப்பதும் தெரியவந்துள்ளது.

இதையடுத்து மாணவி, குழந்தை, நரசிம்மனை காவலர்கள் தர்மபுரி அழைத்துவந்து விசாரணை செய்து நரசிம்மனை போக்சோ சட்டத்தின்கீழ் கைதுசெய்தனர்.

இதையும் படிங்க: '50 சவரன் நகை திருட்டு: தீவிர விசாரணையில் காவலர்கள்!'