யானை தாக்கி முதியவர் உயிரிழப்பு

கோயம்புத்தூர் தொண்டாமுத்தூர் வனப்பகுதியில் யானை தாக்கி பழங்குடியின முதியவர் உயிரிழந்தார்.

கோயம்புத்தூர்: தொண்டாமுத்தூர் அடுத்த அட்டுக்கல் பழங்குடியினர் கிராமத்தைச் சேர்ந்த வெள்ளியங்கிரி (70), வனப்பகுதியில் வியாழக்கிழமை புல் சேகரிக்க சென்றுள்ளார்.

அப்போது அங்கு வந்த ஒற்றை ஆண் யானை வெள்ளியங்கிரியை தாக்கி தூக்கி வீசியுள்ளது.இதில் சம்பவ இடத்திலேயே அவர் உயிரிழந்தார். இதனையடுத்து வனப்பகுதிக்குள் சென்ற வெள்ளியங்கிரி வீடு திரும்பாததால் அவரது உறவினர்கள் அந்த பகுதியில் தேடியுள்ளனர்.

அப்போது ஓரிடத்தில் யானை நீண்ட நேரமாக பிளிரியவாறு நின்றுகொண்டிருந்தது தொடர்ந்து அவர்கள் அங்கு சென்று பார்த்தபோது வெள்ளியங்கிரி உயிரிழந்த நிலையில் கிடந்துள்ளார். இதனையடுத்து சத்தம் எழுப்பி யானையை விரட்டிய அவர்கள் இது குறித்து வனத்துறையினருக்கு தகவல் அளித்தனர்.

அதன்பேரில் அங்கு விரைந்த வனத்துறையினர் வெள்ளியங்கிரியின் உடலை கைப்பற்றி பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர். இதுகுறித்து வனத்துறையினர் கூறுகையில், தற்போது வனப் பகுதியில் நல்ல மழை பெய்து வருவதால் அங்கு முளைக்கும் புல்லை சேகரிக்க சென்ற நிலையில் யானை தாக்கி உள்ளது.

வனப்பகுதியில் ஏராளமான யானைகள் உள்ளதால் ஆடு மாடுகளை மேய்க்க வனப்பகுதிக்குள் செல்ல வேண்டாம் என வனத்துறையினர் அறிவுறுத்தியுள்ளனர். மேலும் மாலை மற்றும் அதிகாலை நேரங்களில் மலையடிவார கிராமங்களில் வசிக்கும் பொதுமக்கள் அவசியம் இன்றி வெளியே நடமாட வேண்டாம் எனவும் எச்சரிக்கப்பட்டுள்ளது.

இதையும் படிங்க:பெற்ற குழந்தையின் முன் நடந்த பெற்றோர் திருமணம்