பாஜக போஸ்டர் மீது சாணி அடித்த பெண்; பாஜவினர் சாலை மறியல்

தாம்பரத்தில் பாஜக போஸ்டர் மீது சாணி அடித்த பெண் மீது நடவடிக்கை எடுக்க கோரி பாஜகவினர் சாலை மறியலில் ஈடுபட்டனர்.

சென்னை:பிரதமர் மோடியின் 72ஆவது பிறந்த நாளை முன்னிட்டு மேற்கு தாம்பரம், முல்லை நகர் பகுதியில் உள்ள புது தாங்கள் ஏரியில் நேற்று முன்தினம் மாலை தூய்மை இந்தியா திட்டத்தின் தூய்மை பணிகள் மற்றும் மரக்கன்றுகள் நடும் நிகழ்ச்சி தாம்பரம் நகர பாஜக தலைவர் கணேஷ் ஏற்பாட்டில் நடைபெற்றது.

இதில் மத்திய இணை அமைச்சர் எல்.முருகன், மாநில செயலாளர் வினோஜ் பி.செல்வம், நிர்மல் குமார், செங்கல்பட்டு மாவட்டம் பாஜ தலைவர் செம்பாக்கம் வேதசுப்பிரமணியம் உட்பட ஏராளமானோர் கலந்து கொண்டனர். இந்த நிகழ்ச்சிக்காக முல்லை நகர் மற்றும் அதன் சுற்றுவட்ட பகுதி முழுவதும் தாம்பரம் நகர பாஜக சார்பில் ஏராளமான போஸ்டர்கள் ஒட்டப்பட்டு, ஆங்காங்கே கட்சிக் கொடிகள், அலங்கார விளக்குகள் வைக்கப்பட்டன.

இந்நிலையில் நேற்று முல்லை நகர் பிரதான சாலையில் ஒட்டப்பட்டு இருந்த போஸ்டரில் பிரதமர் மோடி, மத்திய இணை அமைச்சர் எல்.முருகன், மாநிலத் தலைவர் அண்ணாமலை ஆகியோரின் படங்களில் மர்ம நபர்கள் சாணி அடித்திருந்தனர்.

இதனை கண்ட 50-க்கும் மேற்பட்ட பாஜவினர் தாம்பரம் நகர தலைவர் கணேஷ் தலைமையில் கண்டன கோஷங்கள் எழுப்பி முல்லை நகர் பிரதான சாலையில் ஊர்வலமாக நடந்து சென்று தாம்பரம் - முடிச்சூர் பிரதான சாலையில் அமர்ந்து சாலை மறியலில் ஈடுபட்டனர்.

சம்பவம் குறித்து தகவல் அறிந்த போலீசார் சம்பவ இடத்திற்கு சென்று சம்பந்தப்பட்ட நடவடிக்கை எடுப்பதாக உறுதி அளித்து சாலை மறியலில் ஈடுபட்டிருந்த பாஜகவினரை சமாதானப்படுத்தி கலைந்து செல்ல செய்தனர். இதனிடையே அப்பகுதியில் உள்ள கண்காணிப்பு கேமரா காட்சிகளை சேகரித்து ஆய்வு செய்ததில் பெண் ஒருவர் பாஜக போஸ்டர் மீது சாணி அடித்தது தெரிய வந்தது. இதனைத் தொடர்ந்து அந்தப் பெண் மீது தாம்பரம் போலீசார் வழக்குப்பதிவு செய்து விசாரணை நடத்தி வருகின்றனர்.

இதையும் படிங்க:தூத்துக்குடியில் அனுமதியின்றி ஒட்டப்பட்ட போஸ்டர் - தடுத்த போலீசாரைத் தாக்கிய 4 பேர் கைது