கஞ்சா வாங்குவது தொடர்பாக தகராறு; இளைஞர் வெட்டிக்கொலை

ஆரணி அருகே கஞ்சா வாங்குவது தொடர்பாக ஏற்பட்ட தகராறில் இளைஞர் வெட்டிக்கொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.

திருவள்ளூர்: ஆரணி இருளர் காலணியில் வசிப்பவர், சின்னமணி. இவர் ஆரணி காவல் நிலையம் அருகே டிஃபன் கடை நடத்தி வருகிறார். மேலும் இவர் கஞ்சா விற்பனை செய்து வருவதாகக் கூறப்படுகிறது.

நேற்று இரவு பெரியபாளையம், தண்டுமா நகர் பகுதியினைச்சேர்ந்த சரத் (வயது 21) மற்றும் மாரிமுத்து ஆகியோர் கஞ்சா வாங்குவது தொடர்பாக மோட்டார் சைக்கிளில் சின்னமணி வீட்டிற்கு வந்தனர். அப்போது ஏற்பட்ட வாக்குவாதத்தில் சின்ன மணி மறைத்து வைத்திருந்த கத்தியால் சரத் மற்றும் மாரிமுத்துவை வெட்டியதில், சரத் சம்பவ இடத்திலேயே உயிரிழந்தார். மாரிமுத்து லேசான காயங்களுடன் தப்பியதாக கூறப்படுகிறது.

இந்த கொலை சம்பவம் குறித்து தகவல் அறிந்த ஆரணி காவல்துறையினர் சடலத்தை மீட்டு பிரேதப் பரிசோதனைக்காக பொன்னேரி அரசு மருத்துவமனைக்கு அனுப்பி வைத்தனர். இந்த நிலையில் சின்னமணி ஆரணி காவல் நிலையத்தில் சரணடைந்தார். கொலை குறித்து ஆரணி காவல் துறையினர் விசாரணை மேற்கொண்டு வருகின்றனர்.

இதையும் படிங்க:கும்மிடிப்பூண்டி அருகே காணாமல்போன சிறுமி ஏரியில் சடலமாக மீட்பு.. திடுக்கிடும் தகவல்கள்...