விளையாடிக் கொண்டிருந்த சிறுமி மாயம் - தேடுதல் வேட்டையில் போலீஸ்!

பல்லாவரம் அருகே பக்கத்து வீட்டில் விளையாடி கொண்டிருந்த 10 வயது சிறுமி மாயமாகியுள்ளார். மோப்ப நாய் உதவியுடன் சிறுமியைத் தேடும் பணியில் காவல் துறையினர் ஈடுபட்டு வருகின்றனர்.

சென்னை: பல்லாவரம் அடுத்த பம்மல் இந்திரா நகரைச் சேர்ந்த ஜக்ரியா அப்பாஸ், அமீதா தம்பதியின் 10 வயது மகள் தனியார் பள்ளியில் 3ஆம் வகுப்பு படித்து வருகிறார்.

பக்கத்து வீட்டில் உள்ள சிறுவர்களுடன் நேற்று (ஆகஸ்ட் 3) விளையாடிக் கொண்டிருந்த சிறுமி, பின்னர் தான் கடைக்கு செல்வதாகக் கூறிவிட்டு சென்றுள்ளார். இந்நேரத்தில், வேலைக்கு சென்று திரும்பிய பெற்றோர் மகளை காணவில்லை எனத் தேடியுள்ளனர்.

வெகு நேரமாகியும் மகள் கிடைக்காததால் அதிர்ச்சியடைந்த பெற்றோர், காவல் நிலையத்தில் புகாரளித்தனர். சம்பவம் குறித்து வழக்குப்பதிவு செய்த பரங்கிமலை காவல் துறையினர், மோப்ப நாய் டைசன் உதவியுடன் சிறுமியை தேடும் பணியில் ஈடுபட்டுள்ளனர்.

மேலும், அப்பகுதியில் உள்ள கண்காணிப்பு கேமரா காட்சிகளை காவல் துறையினர் ஆய்வு செய்து வருகின்றனர்.