வேலூர்: தோட்டப்பாளையம் காட்பாடி சாலையிலுள்ள ஜோஸ் ஆலுக்காஸ் நகைக் கடையில் கடந்த டிசம்பர் 15ஆம் தேதி சுவற்றில் துளையிடப்பட்டு தங்கம், வைர நகைகள் கொள்ளையடிக்கப்பட்டன. இது குறித்து தகவல் கிடைத்தவுடன் வேலூர் மாவட்ட காவல் கண்காணிப்பாளர் ராஜேஷ் கண்ணன், வேலூர் சரக காவல்துறை துணைத் தலைவர் ஏ.ஜி. பாபு ஆகியோர் நேரில் சென்று ஆய்வு செய்தனர்.
நகைக்கடையின் உள்ளே இருந்த கண்காணிப்பு கேமராக்களில் ஸ்பிரே அடித்து நகைகளைத் திருடி சென்றதும், கொள்ளையன் முழுமையாக சிங்கம் உருவத்துடன் கூடிய மாஸ்க் மற்றும் தலையில் விக் அணிந்து சென்றதும் முதற்கட்ட விசாரணையில் தெரிய வந்தது. இந்நிலையில், தீவிர விசாரணைக்குப் பிறகு கொள்ளையனை கண்டுபிடித்து அவனிடமிருந்து கொள்ளையடிக்கப்பட்ட அனைத்து நகைகளையும் வேலூர் மாவட்ட காவல் துறையினர் மீட்டுள்ளனர்.
புலன் விசாரணை
இது தொடர்பாக செய்தியாளர்களை சந்தித்த வேலூர் சரக காவல்துறை துணைத் தலைவர் ஏ.ஜி. பாபு கூறுகையில், வேலூர் மாவட்ட காவல் கண்காணிப்பாளரின் நேரடி தலைமையில் எட்டு தனிப்படைகள் அமைக்கப்பட்டன. இவர்கள் பல்வேறு கோணங்களில் புலன் விசாரணை செய்து ஐந்து நாள்களிலேயே குற்றவாளியைக் கைது செய்து கொள்ளையடிக்கப்பட்ட எட்டு கோடி மதிப்பிலான சுமார் 16 கிலோ தங்கம், வைர நகைகளை மீட்டுள்ளனர். இதில் குறிப்பிடும்படியாக தனிப்படையினர், விஞ்ஞானப் பூர்வமாகவும், பழைய முறைகளை பின்பற்றியும் புலன் விசாரணை மேற்கொண்டனர்.
கைது
இரவு, பகல் பாராமல் கடுமையாக உழைத்து குற்றவாளியைக் கைது செய்துள்ளனர். குச்சிப்பாளையம் பகுதியைச் சேர்ந்த 22 வயதான டீக்காராமன் என்பவர் இந்த குற்றச்சம்பவத்தில் ஈடுபட்டுள்ளார்.
அவரை நேற்று (டிச. 20) பிற்பகல் ஒடுகத்தூர் அருகே காவல் துறையினர் கைது செய்தனர். பின்னர் அவரிடம் மேற்கொள்ளப்பட்ட விசாரணையில் ஒடுகத்தூர் பகுதியிலுள்ள சுடுகாட்டில் கொள்ளையடிக்கப்பட்ட நகைகளை வைத்திருப்பது தெரிய வந்தது.
அதனை அவரிடமிருந்து கைப்பற்றினர். மேலும், இக்குற்றச் சம்பவத்தில் வேறு யாரேனும் ஈடுபட்டுள்ளனரா என்பது குறித்தும் தொடர் விசாரணை மேற்கொள்ளப்பட்டு வருகிறது. இவர் மீது குடியாத்தம் பகுதியில் இருசக்கர வாகனங்களை திருடியதற்கான இரண்டு வழக்குகள் நிலுவையில் உள்ளன.
அலாரம் பழுது
இந்த நகைக்கடையில் பர்களரி அலாரம்(Burglar Alarm), அதாவது அத்துமீறி கடையினுள் நுழைந்தால் ஒளி எழுப்பும் கருவி இருந்தும் வேலை செய்யவில்லை. மேலும், அந்த அலாரம் வேலை செய்கிறதா என்பதையும் கடையின் நிர்வாகத்தினர் சோதனை செய்யவில்லை.
இன்னொரு மிகப்பெரிய பிழை சிசிடிவி கேமிரா கடையினுள் மட்டுமே பொருத்தப்பட்டிருந்ததே தவிர கடையின் பின்புறம் மற்றும் அதனைச் சுற்றியுள்ளப் பகுதிகளில் பொருத்தப்படவில்லை.
துளையிட்டுக் கொள்ளை
கொத்தனாராக பணியாற்றி வரும் கொள்ளையன் பத்து நாள்கள் திட்டமிட்டு, ஒவ்வொரு இரவும் வந்து பொறுமையாகத் துளையிட்டு இந்த கொள்ளைச் சம்பவத்தை அரங்கேற்றியுள்ளான் என்பது விசாரணையில் தெரிய வந்துள்ளது. கடையில் பகல் மற்றும் இரவு நேரங்களில் இரண்டு காவலாளிகள் காவல் பணியிலிருந்தும் அவர்கள் பின் பகுதிக்குச் சென்று பார்க்கவில்லை. இதனால், அந்தத் துளை அவர்களுக்குத் தெரியவில்லை.