மாவடி குளத்தில் படகு சவாரி திட்டத்தை செயல்படுத்த கோரிக்கை

திருச்சி: மாவடி குளத்தில் படகு சவாரி திட்டத்தை செயல்படுத்த நடவடிக்கை எடுக்க வேண்டும் என்று பொதுமக்கள் சார்பில் வலியுறுத்தப்பட்டுள்ளது.

திருச்சியில் சுற்றுலா தளங்களின் எண்ணிக்கை மிகவும் குறைவு. பொழுதுபோக்கு அம்சங்களுடன் கூடிய சுற்றுலா தளங்களின் எண்ணிக்கை விரல் விட்டு எண்ணும் அளவிலேயே உள்ளது. அதிலும் பொதுமக்கள், சிறுவர் சிறுமியர்கள், சுற்றுலாப்பயணிகள் அதிகம் விரும்பும் படகு சவாரி என்பது திருச்சிக்கு எட்டாக்கனியாகவே உள்ளது.

ஏற்கனவே திருச்சி மெயின்கார்டு கேட் தெப்பக்குளத்தில் படகு சவாரி நடந்து வந்தது. தெப்பக்குளத்தில் முதலைகள் நடமாட்டம் இருந்ததால் படகு சவாரி ரத்து செய்யப்பட்டது. இதற்கு அடுத்தபடியாக முக்கொம்பு மேலணை பொழுதுபோக்கு பூங்காவில் செயற்கை நீர்நிலை அமைக்கப்பட்டு படகு சவாரி நடந்தது. சில நாட்களில் இதுவும் பராமரிப்பின்றி சிதலமடைந்து விட்டது.

இதனால் திருச்சியில் படகு சவாரி முற்றிலும் இல்லை என்ற நிலை உருவாகிவிட்டது. இந்நிலையில் திருச்சி பொன்மலைப்பட்டி அருகே கீழக்குறிச்சி கிராமத்தில் உள்ள மாவடி குளம் சமீபத்தில் ஆக்கிரமிப்புகளின் பிடியில் இருந்து மீட்கப்பட்டு, பொதுப்பணித்துறை சார்பில் 1.92 கோடி ரூபாய் செலவில் குளத்தின் கரையில் பக்கவாட்டில் 210 மீட்டருக்கு சுவர்அமைக்கப்பட்டு புதுப்பொலிவு பெற்றுள்ளது.

இங்கு நடைபயிற்சி மேற்கொள்ளும் வகையில் நடைபாதையும் அமைக்கப்பட்டுள்ளது. காவிரி ஆற்றிலிருந்து புது கட்டளை மேட்டு வாய்க்கால் வழியாக இந்த குளத்துக்கு தண்ணீர் வருகிறது. தற்போது குளத்தில் முழு கொள்ளளவில் 80 விழுக்காடு நீர் நிரம்பி, அதிகபட்சமாக குளத்தின் ஆழம் 4 அடி வரை உள்ளது.

இந்த குளத்தில் படகு சவாரி திட்டத்தைச் செயல்படுத்த அப்பகுதி மக்கள் கோரிக்கை விடுத்த நிலையில் இதற்கான ஏற்பாடுகளைதிருச்சி இயற்கை ஆர்வலர் சங்கத்தினர் செய்தனர். புதுப்பொலிவு பெற்றுள்ள மாவடி குளத்தை பொழுதுபோக்கு அம்சங்களுடன் கூடிய சுற்றுலா தளமாக உருவாக்க கீழக்குறிச்சி மக்கள் ஒன்றிணைந்து படகு சவாரி திட்டத்தை அமல்படுத்த முடிவு செய்தனர்.

இதற்காக நிதி திரட்டி ரூ.1.75 லட்சத்தில் 2 படகுகள் வாங்கப்பட்டன. கொடைக்கானல், ஊட்டி போன்ற ஏரிகளில் உள்ளது போல் சுயமாக பெடல் மிதித்து இந்த படகுகளை இயக்கலாம். தற்போது அனைத்து ஏற்பாடுகளும் முடிவடைந்த நிலையில் முறையான அனுமதியை மாவட்ட நிர்வாகம் வழங்கவில்லை என்ற குற்றச்சாட்டு எழுந்துள்ளது. இதனால் தங்களது பகுதி சுற்றுலா தளமாக மாறும் என்ற நம்பிக்கையிலிருந்த அந்த பகுதி மக்கள் ஏமாற்றமடைந்துள்ளனர்.

படகு சவாரிக்கு அனுமதி கிடைக்காததால் வாங்கிய படகுகள் முடங்கி கிடக்கின்றன. ஆகையால் பொதுப்பணித்துறை, மாநகராட்சி, மாவட்ட நிர்வாகம், தீயணைப்புத்துறை, சுற்றுலா துறை ஆகிய துறைகள் ஒருங்கிணைந்து மாவடி குளத்தில் விரைவில் படகு சவாரி திட்டத்தை செயல்படுத்த நடவடிக்கை எடுக்க வேண்டும் என்று கோரிக்கை எழுந்துள்ளது.

இதையும் படிங்க:திருச்சியில் ரயில்வே சுரங்கப் பாதையில் மழை நீர்: வாகன ஓட்டிகள் அவதி!