கஞ்சா விற்ற மகன் கைது: தாயின் விபரீத முடிவு!

திருச்சி: கஞ்சா விற்பனையில் ஈடுபட்டு வந்த மகனை கைது செய்த காவல் துறையினரை கண்டித்து அவரது தாய் தீக்குளித்த சம்பவம் பரபரப்பை ஏற்படுத்தியுள்ளது.

திருச்சி காந்தி மார்க்கெட் வடக்கு பகுதியைச் சேர்ந்தவர் படையப்பா. இவர் அப்பகுதியில் கஞ்சா விற்பனையில் ஈடுபட்டதாக காந்தி மார்கெட் காவல் துறையினருக்கு தகவல் கிடைத்துள்ளது. பின் படையப்பாவின் வீட்டுக்கு சென்று காவல் துறையினர் சோதனை மேற்கொண்டபோது, வீட்டில் மறைத்து வைத்திருந்த கஞ்சாவை பறிமுதல் செய்தனர். மேலும், படையப்பாவை கைது செய்து காவல் நிலையத்திற்கு அழைத்துவந்தனர்.

இதனையறிந்து காவல் நிலையத்திற்கு வந்த படையப்பாவின் தாய் தமிழ்ச்செல்வி திடீரென மண்ணெண்ணெயை தனது உடல்மீது ஊற்றி தீ வைத்துக்கொண்டு காவலர்களை கண்டித்து கோஷமிட்டார். உடனடியாக காவலர்கள் தண்ணீரை ஊற்றி தீயை அணைத்து தமிழ்ச்செல்வியை மீட்டு, அரசு மருத்துவமனையில் சிகிச்சைக்காக சேர்த்தனர்.

அதன்பின், காவல் துறையினர் படையப்பாவை திருச்சி மத்திய சிறையில் அடைத்தனர். படையப்பா மற்றும் அவரது தாய் தமிழ்ச்செல்வி ஆகிய இருவர் மீதும் ஏற்கனவே கஞ்சா வழக்கு நிலுவையில் உள்ளது குறிப்பிடத்தக்கது.

இதையும் படிங்க: கஞ்சா கடத்தல்காரர்களை சினிமா பாணியில் விரட்டிப் பிடித்த காவல் துறை!