மதுரை: சாத்தான்குளம் கொலை வழக்கில் ஏற்கனவே காவல் உதவி ஆய்வாளர் ரகு கணேஷ், ஆய்வாளர் ஸ்ரீதர் உள்ளிட்ட ஐந்து காவல் துறையினரை மூன்று நாள்கள் சிபிஐ காவலில் எடுத்து விசாரணை நடத்திய நிலையில், வழக்கில் இரண்டாம் கட்டமாக கைதுசெய்யப்பட்ட காவலர்கள் செல்லதுரை, சாமத்துரை, வெயில்முத்து ஆகியோரை 23ஆம் தேதிவரை சிபிஐ காவலில் விசாரிக்க மதுரை மாவட்ட தலைமை நீதிமன்றம் அனுமதி அளித்திருந்தது.
இச்சூழலில் மூன்று காவலர்களையும் ஜூலை 21ஆம் தேதி சாத்தான்குளம் காவல் நிலையம், பென்னிக்ஸ் கடை அமைந்திருந்த பகுதிகளுக்கு நேரில் அழைத்துச் சென்று சிபிஐ காவல் துறையினர் விசாரணை நடத்தினர். இரவில் மதுரை சிபிஐ அலுவலகத்திற்கு மூன்று பேரையும் அழைத்து வந்தனர்.
சாத்தான்குளம் விவகாரம்: மாவட்ட நிர்வாகத்திற்கு நோட்டீஸ்!
இதற்கிடையே சிபிஐ குழுவில் இடம்பெற்றிருந்த இருவருக்கு கரோனா தொற்று ஏற்பட்ட நிலையில், இன்று காலை வாக்குமூலங்களை ஆவணப்படுத்தும் பணிகள் நடைபெற்றதைத் தொடர்ந்து காவல் துறையினர் மூன்று பேரையும் மதுரை மாவட்டத் தலைமை நீதிமன்ற நீதிபதி ஹேமானந்த குமார் முன்னிலையில் ஆஜர்படுத்தபட்டதையடுத்து, மூவருக்கும் ஆகஸ்ட் 5ஆம் தேதிவரை நீதிமன்றக் காவலை நீட்டித்து நீதிபதி உத்தரவிட்டார்.