தூத்துக்குடியில் உறவினர் வீட்டிலேயே திருடியவர் உள்பட 2 பேர் கைது

தூத்துக்குடி அருகே உறவினர் வீட்டிலேயே 80 சவரன் நகை, ரூ. 3 லட்சம் பணம் திருடிய இரண்டு இளைஞர்களை காவல் துறையினர் கைது செய்த நிலையில், புதிய திருப்பமாக அவர்களிடம் இருந்து நகையை திருடிய மற்றொருவரை போலீசார் தேடி வருகின்றனர்.

தூத்துக்குடி: தூத்துக்குடி மாவட்டம் விளாத்திகுளத்தில் உள்ள சல்லி செட்டிபட்டி கிராமத்தில் ராதா - செல்லபாண்டியன் தம்பதியினருக்கு சொந்தமான வீட்டில் கடந்த ஜூலை 20ஆம் தேதி திருட்டு சம்பவம் அரங்கேறியது. வீட்டு பீரோவில் இருந்த 80 சவரன் நகை மற்றும் 3 லட்ச ரூபாய் பணம் திருடுபோனது குறித்து, சங்கரலிங்கபுரம் காவல் துறையினர் வழக்குப்பதிவு செய்து விசாரணை மேற்கொண்டு வந்தனர்.

இச்சம்பவத்தில் திடீர் திருப்பமாக செல்லபாண்டியனின் உறவினர் மணிகண்டன் என்பவர்தான் திருடியுள்ளது விசாரணையில் அம்பலமானது. இச்சம்பவம் நடந்த இரண்டு நாள்களுக்குப் பின் மணிகண்டன், தான் வேலைக்கு செல்வதாக கூறிவிட்டு மதுரை சென்றுள்ளார்.

இச்சூழலில் காவல் துறையினர் மாயமான நகை குறித்து தீவிர விசாரணை மேற்கொண்டு வந்த நிலையில், முதற்கட்டமாக மணிகண்டனை விசாரணைக்காக அழைத்துள்ளனர். ஆனால், மணிகண்டன் விசாரணைக்கு வரவில்லை. இதனால், சந்தேகம் அடைந்த காவலர்கள் மணிகண்டனை பிடித்து, விசாரணை மேற்கொண்டதில் பல்வேறு அதிர்ச்சி தகவல்கள் வெளிவந்தன.

முதலில், மணிகண்டன் தன்னுடைய நண்பர் வசந்தகுமார் என்பவருடன் செல்லப்பாண்டியன் வீட்டில் திருடிய பணத்தை வைத்துக்கொண்டு மதுரை பெரியார் பேருந்து நிலையம் அருகே உள்ள தனியார் விடுதியில் தங்கியுள்ளனர். அவர்கள் மது அருந்தியபடியே பேசிக்கொண்டு, நகையை எவ்வாறு விற்கலாம் என்று தேனியைச் சேர்ந்த தனது நண்பர் பிரபாகரனை தொடர்பு கொண்டு கேட்டுள்ளனர். அப்போது, தான் நேரடியாக வருவதாகவும், நகையை விற்று தருவதாகவும் பிரபாகரன் கூறியுள்ளார்.

இதற்கிடையில் மணிகண்டன் அவரது அண்ணனிடம், தான் ஒரு பெண்ணை காதலிப்பதாகவும் அவளை திருமணம் செய்துகொள்ள இருப்பதாகவும் கூறியுள்ளார். மேலும், காதலியுடன் ஊட்டியில் நான்கு நாள்கள் சுற்றுலா செல்ல இருப்பதாகவும் தெரிவித்துள்ளார்.

இதனையடுத்து, மணிகண்டனுக்கு திடீரென்று மனமாற்றம் ஏற்பட்டு, நகையை விற்க வேண்டாம் உறவினரிடமே கொடுத்து விடலாம் என்று கூறியுள்ளார். அதற்கு நகையை விற்க தேனியில் இருந்து வந்த பிரபாகரன், ஒன்றும் கவலைப்பட வேண்டாம் என்றும் தான் இந்த நகையை விற்றுத் தருகிறேன் என்றும் கூறியுள்ளார். தொடர்ந்து, விருதுநகரில் இருந்து காரை வரவழைத்து அங்கிருந்து இவர்கள் மூவரும் கோவாவுக்கு சுற்றுலா சென்று திரும்பியுள்ளனர்.

மீண்டும் மணிகண்டன், வசந்தகுமார், பிரபாகரன் மூவரும் மதுரையில் உள்ள தனியார் விடுதியில் தங்கி மது அருந்தியுள்ளனர். அப்போது, மணிகண்டனும், வசந்தகுமாரும் போதையில் மயங்கி கிடந்தனர். இந்த சந்தர்ப்பத்தை பயன்படுத்தி கொண்ட பிரபாகரன், அவர்கள் வைத்திருந்த நகையை திருடிச் சென்றுள்ளார்.

தற்போது மணிகண்டனையும், வசந்தகுமாரையும் காவல் துறையினர் கைது செய்து, சிறையில் அடைத்தனர். நகையை திருடி கொண்டு தப்பி ஓடிய பிரபாகரனை சங்கரலிங்கபுரம் காவல்துறையினர் தீவிரமாக தேடி வருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

இதையும் படிங்க:வடிவேலு பாணியில் டெஸ்ட் டிரவ் என 8 லட்சம் ரூபாய் ஜீப்புடன் எஸ்கேப்பான ஆசாமி