நாளை மறுநாள் தொடங்குகிறது மக்கள் நீதி மன்றம்!

தூத்துக்குடி: மெகா லோக் அதாலத் என சொல்லப்படும் மக்கள் நீதி மன்றம் நாளை மறுநாள் தொடங்க உள்ளது, இதில் 5,000க்கும் மேற்பட்ட வழக்குகளுக்கு தீர்வு காணப்படும் என மாவட்ட முதன்மை நீதிபதி சுரேஷ் விஸ்வநாதன் தெரிவித்துள்ளார்.

தூத்துக்குடி மாவட்டத்தில் உள்ள நீதிமன்றங்களில் நாளை மறுநாள் லோக் அதாலத் நிகழ்ச்சி நடைபெற உள்ளது. இதுகுறித்து அம்மாவட்ட முதன்மை நீதிபதி சுரேஷ் கூறுகையில், "தேசிய சட்டப்பணிகள் ஆணைக் குழு, மாநில சட்டப்பணிகள் ஆணைக் குழுக்களின் வழிகாட்டுதலின்படி லோக் அதாலத் நிகழ்ச்சி நடைபெற்று வருகிறது.

லோக் அதாலத் என்பது இந்தியாவில் ஆண்டுக்கு நான்கு முறை நடத்தப்படும். அதன்படி இரண்டாவது முறையாக, நாளை மறுநாள் தூத்துக்குடி மாவட்டத்தில் நடைபெற உள்ளது. இதில் மோட்டார் வாகன வழக்குகள், சிவில், காசோலை மோசடி, குடும்ப நல வழக்குகள் உட்பட 5,000க்கும் மேற்பட்ட நீதிமன்றங்களில் நிலுவையில் உள்ள வழக்குகள் விசாரணைக்கு எடுத்துக் கொள்ளப்படும்.

இதுவரையில் தூத்துக்குடி மாவட்டத்தில் நடந்த லோக் அதாலத் நிகழ்ச்சியின் மூலமாக உரிமை வழக்குகளில் 79 ஆயிரத்து 58 ஆயிரம் ரூபாய்க்கும், மோட்டார் வாகன இழப்பீடு வழக்குகளில் 1 கோடியே 12 லட்சத்து 40 ஆயிரம் ரூபாய் அளவுக்கு என மொத்தம் 1 கோடியே 91 லட்சத்து 98 ஆயிரம் ரூபாய்க்கு வழக்குகள் முடித்துவைக்கப்பட்டுள்ளன. இவை தவிர தூத்துக்குடி மாவட்ட சட்டப்பணிகள் ஆணைக் குழுவின் மூலமாக 210 வழக்குகள் விசாரணைக்கு எடுக்கப்பட்டு அதில் 36 வழக்குகளுக்கு தீர்வு காணப்பட்டது.

அதுபோல தாலுகா சட்டப்பணிகள் அமர்வுகளான கோவில்பட்டி, திருச்செந்தூர், ஸ்ரீவைகுண்டம் ஆகிய இடங்களில் நடைபெற்ற லோக் அதாலத் மூலமாக மொத்தம் 756 வழக்குகள் எடுத்துக் கொள்ளப்பட்டதில் 102 வழக்குகளுக்கு தீர்வு காணப்பட்டுள்ளன.

இதன் மூலமாக 80 ஆயிரத்து 93 ஆயிரம் ரூபாய்க்கு வழக்கு முடித்துவைக்கப்பட்டுள்ளது. இதுவரை லோக் அதாலத் நிகழ்ச்சியின் மூலமாக மொத்தம் ரூ.2 கோடியே 72 லட்சத்து 91 ஆயிரம் அளவுக்கு தூத்துக்குடி மாவட்டத்தில் நிலுவையில் இருந்த வழக்குகளுக்கு தீர்வு காணப்பட்டுள்ளது.

லோக் அதாலத் நிகழ்ச்சியின் மூலம் தீர்வு காணப்படும் வழக்குகளுக்கு மேல் முறையீடு செய்ய முடியாது. மாணவர்கள் கல்விக் கடன் மீதான வழக்குகளில் வட்டித் தள்ளுபடி ஆகியவையும் எடுத்துக் கொள்ளப்படுவதால் அனைவரும் கலந்துகொண்டு பயன்பெற வேண்டும். லோக் அதாலத் நிகழ்ச்சியில் 10 கோடி ரூபாய் அளவுக்கு வழக்குகள் தீர்வு காணப்படலாம். அதன்படி மாவட்டத்தில் 18 அமர்வுகள் மூலமாக வழக்கு விசாரணை நடத்தப்படும். இது குறித்து பொதுமக்களுக்கு விழிப்புணர்வு ஏற்படுத்தும் வகையில் பல்வேறு நடவடிக்கைகள் மாவட்ட சட்டப்பணிகள் ஆணைக்குழுவின் மூலம் எடுக்கப்பட்டுள்ளன" என்றார்.