நாடு முழுவதும் 18 வயதிற்கு கீழ் உள்ள சிறுவர்கள் கொலை போன்ற கொடூர குற்றங்களில் ஈடுபட்டால் அது தொடர்பான வழக்குகள் இளஞ்சிறார்கள் நீதி குழுமத்தில் மட்டுமே விசாரிக்கப்பட்டு வந்தது. இதன் மூலம் குற்றங்கள் நிரூபிக்கப்பட்டாலும் கூட சம்பந்தப்பட்ட சிறுவர்களுக்கு அதிகபட்சம் மூன்று ஆண்டுகள் மட்டுமே தண்டனை கிடைத்து வந்தது.
இது போன்ற நிலையில் சமீபத்தில் கொண்டுவரப்பட்ட சட்ட திருத்தத்தின் படி 16 வயது நிறைந்த சிறார்கள் கொடூர குற்றங்களில் ஈடுபடும் பட்சத்தில் அவர்கள் முழுமையான பருவம் அடைந்தவர்கள் என கருதி அந்த குற்றத்திற்கான விசாரணையை இளஞ்சிறார் நீதி குழுமத்தில் இருந்து மாவட்ட நீதிமன்றத்திற்கு மாற்றி வழக்கமான குற்ற நடைமுறை விசாரணையை பின்பற்ற வழிவகை செய்துள்ளது.
இதன் மூலம் அந்த குற்றத்துக்கு கூடுதல் தண்டனை விதிக்க முடியும். இந்த நிலையில் புதிய சட்ட திருத்தத்தின் படி தமிழ்நாட்டிலையே முதல் முறையாக நெல்லை மாவட்டத்தில் இளஞ்சிறார் வழக்கு ஒன்று இளஞ்சிறார் நீதி குழுமத்திலிருந்து மாவட்ட நீதிமன்றத்துக்கு மாற்றப்பட்டுள்ளது.
அதாவது நெல்லை மாவட்டம் முக்கூடல் அருகே பள்ளக்கால் புதுக்குடி அரசு பள்ளியில் சில மாதங்களுக்கு முன்பு கையில் சாதி அடையாள கயிறு கட்டுவது தொடர்பாக ஏற்பட்ட மோதலில் அங்கு பிளஸ் 2 பயின்று வந்த மாணவனை அதே பள்ளியில் பிளஸ் 1 பயின்று வந்த மூன்று மாணவர்களால் கொடூரமாக கல்லால் அடித்துக் கொல்லப்பட்டார்.