திருநெல்வேலி மாவட்டத்தில் தருவை, வீரவநல்லூர் எனப் பரவலாக பல்வேறு இடங்களில், காட்டு நாயக்கர் சமூக மக்கள் வசித்துவருகின்றனர். அவர்கள் தொடர்ந்து தங்களுக்குச் சாதிச் சான்றிதழ் வழங்க வேண்டி பல ஆண்டுகளாகப் போராடிவருகின்றனர்.
அந்த வகையில் இம்மக்களின் வாழ்வியல் பண்பாடு குறித்து, சென்னை பல்கலைக்கழக மானுடவியல் துறை ஆய்வு மேற்கொண்டு காட்டு நாயக்கர் சமூகம் என சாதிச் சான்றிதழ் வழங்கலாம் என்று கடந்த ஜனவரி மாதம் 9ஆம் தேதியே அரசுக்கு அறிக்கை கொடுத்துவிட்டது. அதன் அடிப்படையில் தங்களுக்குச் சாதிச் சான்றிதழ் வழங்க வேண்டுமென்று கேட்டு அச்சமூக மக்கள் தொடர்ந்து வலியுறுத்திவருகின்றனர்.
இந்நேரத்தில், திருநெல்வேலி மாவட்டம் தருவையில் வசித்து வரக்கூடிய காட்டு நாயக்கர் சமூக மக்கள் சாதி சான்றிதழ் கேட்டு திருநெல்வேலி கோட்டாட்சி தலைவரைச் சந்திக்கச் சென்றனர். அப்போது உள்ளே சென்ற மக்களிடம், ’உங்கள் மீது துர்நாற்றம் வீசுவதால் வெளியே செல்லுங்கள்’ என்று கூறியதோடு, தமிழில் பேச மறுத்து இந்தி மொழியில் மட்டுமே கோட்டாட்சியர் (கூடுதல் பொறுப்பு) மனிஷ் நாரணவரே பேசியதாகவும் தெரிகிறது.
கோட்டாட்சியரின் வன்ம உரையாடலை சகித்துக் கொள்ள முடியாமல் போராட்டத்தில் குதித்த மக்கள் இதனால் விரக்தி அடைந்த மக்கள் தங்களுக்கு உடனடியாக மானுடவியல் துறை கொடுத்த அறிக்கையின் அடிப்படையில் காட்டு நாயக்கர் என்று சாதிச் சான்றிதழ் வழங்க வேண்டும் என்று வலியுறுத்தியும், கோட்டாட்சியர் செயல்பாடுகளைக் கண்டித்தும், அவர் அலுவலகம் முன்பு குடும்பத்தோடு அமர்ந்து தர்ணா போராட்டத்தில் ஈடுபட்டனர்.
மேலும் சாதிச் சான்றிதழ் இல்லாத காரணத்தால், காட்டு நாயக்கர் சமூகத்தைச் சேர்ந்த குழந்தைகள் கல்வியைக் கற்க முடியாத நிலை இருப்பதாகவும், ஏதோ சந்தர்ப்ப சூழ்நிலைகளில் கல்வி கற்றாலும்கூட வேலை வாய்ப்புகளில் தங்களுக்கு இடம் கிடைக்காமல் பாதிக்கப்படுவதாகவும் கூறுகின்றனர்.
கல்வியை கற்றுவிட்டு மீண்டும் தாங்கள் பிச்சை எடுக்கும் நிலையிலேயே உள்ளோம். காலத்திற்கும் எங்களது குலத் தொழிலைத் தொடர வேண்டுமா அல்லது பிச்சை எடுத்துதான் பிழைக்க வேண்டுமா எனவும் கேள்வி எழுப்புகின்றனர் காட்டு நாயக்கர் சமூகத்தைச் சேர்ந்த மக்கள். இதனைத் தொடர்ந்து அரசு அலுவலர்கள் நடத்திய பேச்சுவார்த்தையில் அவசியம் சாதிச் சான்றிதழ் வழங்குவதாகக் கூறியதை அடுத்து அவர்கள் கலைந்து சென்றனர்.
