தோரணம்:
அரை நூற்றாண்டு காலமாக சட்டப்பேரவைத் தொகுதியாக இருந்து வருகிறது எடப்பாடி தொகுதி. கடந்த 1989 ஆம் ஆண்டிலிருந்து பல்வேறு காலக்கட்டங்களில், சட்டப்பேரவைத் தேர்தலில் போட்டியிட்டு வரும் முதலமைச்சர் பழனிசாமிக்கு, எடப்பாடி தொகுதி நான்கு முறை வெற்றிகளையும், இரண்டு முறைத் தோல்விகளையும் பரிசளித்துள்ளது.
இதுவரையில், அதிமுக சட்டப்பேரவை உறுப்பினர் பொறுப்புக்காகப் போட்டியிட்டு வந்த பழனிசாமி, இம்முறை அதிமுகவின் அதிகாரப்பூர்வ முதலமைச்சர் வேட்பாளராக எடப்பாடியில் போட்டியிடுவதால் கூடுதல் கவனம் பெறுகிறது இந்தத் தொகுதி.
களம்:
முதலமைச்சர் பழனிசாமி, தனது தொகுதியில் நிறைவேற்றப்பட்டுள்ள நலத்திட்டங்களை பட்டியலிடத் தொடங்கினால், அதனைக் குறிப்பெடுத்துக் கொள்ள பத்திரிக்கையாளர்கள் கொஞ்சம் திணறித்தான் போவர்கள்.
ஏறத்தாழ10 நிமிடங்கள் வரை நீளும் அந்தப் பட்டியல். கடந்த 1989ஆம் ஆண்டு எடப்பாடி சட்டப்பேரவைத் தொகுதியில் ஜெயலலிதா அணி சார்பில் சேவல் சின்னத்தில் போட்டியிட்டு, வெற்றி பெற்று சட்டப்பேரவைக்குத் தேர்ந்தெடுக்கப்பட்டார் பழனிசாமி.
பின்னர் 2006ஆம் ஆண்டு தேர்தலில் பாமகவிடம் வெற்றியை பறிகொடுத்தார். அடுத்து வந்த 2011, 2016 தேர்தல்களில் பாமக வேட்பாளர்களை வென்று அமைச்சரானார்; பின்னர் முதலமைச்சரானார்.
அதிமுகவின் அதிகாரப்பூர்வ முதலமைச்சர் வேட்பாளராக மூன்றாவது தொடர் வெற்றிக்காக தன் சொந்தத் தொகுதியான எடப்பாடியில் களம் காண்கிறார் பழனிசாமி. கடந்த முறைகளில் அதிமுகவை எதிர்த்து களமிறங்கிய பாமக இந்த முறை அதிமுகவின் கூட்டணியில் இடம்பெற்றிருப்பதால், அவரை எதிர்த்து திமுக இம்முறை களம் காணலாம்.திமுகவை வெற்றி பெற வைக்கும் குறிக்கோளுடன் அக்கட்சியின் மேற்கு மாவட்ட பொறுப்பாளர் செல்வகணபதி பணியாற்றி வருகிறார்.சுடுக்காட்டு மேற்கூரை ஊழல் வழக்கில் தண்டனை பெற்றுள்ள செல்வகணபதி, மே மாதம் வரை தேர்தலில் போட்டியிட தடையிருப்பதால், தகுதியான வேட்பாளரைத் திமுக தேடிக்கொண்டிருக்கிறது. இந்த நிலையில் நடிகர் இமான் அண்ணாச்சி, திமுக சார்பில் எடப்பாடி தொகுதியில் போட்டியிட விருப்ப மனு அளித்துள்ளார். தேர்தல் உலா 2021: நட்சத்திரத் தொகுதிகள் - எடப்பாடி...! நிலவரம்:
எடப்பாடி தாலுகா, மேட்டூர் தாலுகாவின் சில பகுதிகள், மூன்று பேரூராட்சிகள், பத்து கிராமங்களை உள்ளடக்கியது எடப்பாடி சட்டப்பேரவைத் தொகுதி. இத்தொகுதியின் பிரதான தொழில் வாழை, தென்னை, நெல், கரும்பு, மஞ்சள் விவசாயம்.நங்கவள்ளி, ஜலகண்டபுரம், எடப்பாடி பகுதிகளில் நெசவும் நடைபெறுகிறது.
மேட்டூர் அணையில் நீர் திறக்கப்படும் போது, பூவாம்பட்டி, நெரிஞ்சிப்பேட்டை இடையே போக்குவரத்து துண்டிக்கப்படுவது, தலைவாசல் கால்நடைப் பூங்காவிற்காக, விளைநிலங்கள் வழியாக காவிரி நீர் கொண்டு செல்லப்படுவது, எண்ணெய் குழாய் பதிப்பது, உயர் மின்கோபுரங்கள் அமைப்பது என, சில பல பிரச்னைகள் இருந்தாலும், மண்ணின் மைந்தர் பழனிசாமிக்கு தொகுதிக்குள் இன்னும் செல்வாக்கு சரியவில்லை.
சாலை வசதிகள் உள்ளிட்ட அடிப்படை வசதிகள், நலத்திட்டங்களை நிறைவேற்றுவதில் மற்ற தொகுதிகளுக்கு முன்னுதாரணத் தொகுதியாக எடப்பாடி விளங்குவதாகக் கூறும் தொகுதிவாசிகளின் கருத்துக்களால், மூன்றாவது முறையாக முதலமைச்சர் பழனிசாமி இங்கு வெற்றி பெற்று மீண்டும் பேரவைக்குள் கால் பதிப்பார் என்கிறது தேர்தல் பட்சி.
