காவிரிக் கரையோர கிராமங்களுக்கு வாகனங்கள் செல்ல தடை..!

சேலம்: காவிரியில் வரலாறு காணாத வெள்ளப் பெருக்கு ஏற்பட்டுள்ள நிலையில், தமிழ்நாடு - கர்நாடக எல்லை பகுதியில் அமைந்துள்ள கோபிநத்தம் உள்ளிட்ட காவிரிக் கரையோர கிராமங்களுக்கு வாகனங்கள் செல்ல கர்நாடக வனத்துறையினர் தடை விதித்துள்ளனர்.

காவிரி நீர்ப்பிடிப்பு பகுதிகளில் கடந்த ஒருவாரமாக கனமழை பெய்து வருகிறது. இதனால் கர்நாடக மாநிலத்தில் காவிரி ஆற்றின் குறுக்கே கட்டப்பட்டுள்ள கேஆர்எஸ், கபினி, ஹேரங்கி உள்ளிட்ட அணைகள் நேற்று முழு கொள்ளளவை எட்டி நிரம்பி வழிகின்றன. மேலும், மூன்று லட்சம் கன அடி நீர் காவிரி ஆற்று அணைகளிலிருந்து வெளியேற்றப்பட்டு உள்ளதாகத் தகவல்கள் வெளியாகியுள்ளன.

இதனால் மேட்டூர் அணையின் நீர்மட்டம் உயர்ந்து வருகிறது. மூன்று நாட்களில் 32 அடி உயர்ந்துள்ளது. தற்போது மேட்டூர் அணையின் நீர்மட்டம் 93 அடியை எட்டியுள்ளது. கடந்த 58 ஆண்டுகளுக்குப்பின் இந்த நிலைமை ஏற்பட்டுள்ளது. தமிழ்நாடு - கர்நாடக எல்லைப் பகுதிகளில் உள்ள காவிரி கரையோர பொதுமக்கள் வெள்ள எச்சரிக்கையால் பீதியில் உள்ளனர்.

இதனையடுத்து சேலம் மாவட்ட ஆட்சியர் ராமன், மேட்டூர் அணை அமைந்துள்ள காவிரி கரையோர பொது மக்கள் வெள்ளத்தின் தன்மை கருதி பரிசல் இயக்கவோ அல்லது கரையோரங்களில் மீன் பிடிக்கவோ கூடாது என்று எச்சரிக்கை விடுத்திருந்தார். இதுபோல கர்நாடக வனத்துறை அலுவலர்கள், தமிழ்நாடு - கர்நாடக எல்லைப் பகுதியில் அமைந்துள்ள கோபிநத்தம் கிராமத்திற்குப் பொதுமக்கள் யாரும் செல்ல வேண்டாம் என்று அறிவுறுத்தியுள்ளனர்.

இந்தத் தடை விதிப்பால் ஒகேனக்கல் செல்ல விரும்பும் கர்நாடக சுற்றுலாப் பயணிகள் ஏமாற்றத்துடன் பாலாறு கிராமத்தோடு திரும்பி மேட்டூர் அல்லது மைசூர் செல்கின்றனர்.