சேலம்: கொங்கணாபுரம் பேரூராட்சியில் முன்களப்பணியாளர்களுக்கு அதிமுக சார்பில் நலத்திட்ட உதவிகளை அதிமுக இணை ஒருங்கிணைப்பாளரும், தமிழ்நாடு எதிர்க்கட்சித் தலைவருமான எடப்பாடி கே.பழனிசாமி இன்று(ஆகஸ்ட்.9) நேரில் வழங்கினார்.
பின்னர் செய்தியாளர்களைச் சந்தித்த அவர், “திமுக அரசு சார்பில், வெள்ளை அறிக்கை வெளியிடுவதில் ஆச்சரியப்படுவதற்கு ஒன்றும் இல்லை. ஒவ்வொரு ஆண்டும் பட்ஜெட் தாக்கல் செய்யப்படுகிறது. அதில் வரவு செலவு வெளியிடப்படுகிறது. 2011-ல் ஒரு லட்சத்து 14 ஆயிரம் கோடி கடனை திமுக அரசு விட்டுச் சென்றார்கள். படிப்படியாக கடன் அதிகரித்துக் கொண்டே செல்கிறது. வளர்ச்சித் திட்டங்களுக்கு கடன் வாங்க வேண்டியுள்ளது. பாதிக்கும் மேல் மூலதனமாக உள்ளது. பல்வேறு மாநிலங்களும் வளர்ச்சிக்காக கடன் வாங்க வேண்டியுள்ளது.
புதிதாக ஒன்றும் செய்யவில்லை
மின்கட்டணம் பல வருடங்களாக உயர்த்தவில்லை. மின்சாதனங்கள், நிலக்கரி பல மடங்கு விலை உயர்ந்துள்ளது. இதனால் அந்த நஷ்டம் ஏற்பட்டுள்ளது. இது திமுக ஆட்சியிலும் நடந்துள்ளது. இதேபோன்று டீசல் விலை உயர்ந்த போதிலும் போக்குவரத்துக் கட்டணம் உயர்த்தவில்லை. அதனால் அந்தத்துறையில் நஷ்டம் ஏற்பட்டுள்ளது. எந்த அரசு வந்தாலும் இதனை தவிர்க்க முடியாது.
ஏற்கனவே அதிமுக அரசில் போட்ட திட்டங்களுக்குத்தான் அடிக்கல் நாட்டி வருகிறார்கள். 100 நாள் திமுக ஆட்சியில் எந்த திட்டமும் நிறைவேற்றியதாக எனக்குத் தெரியவில்லை. அதிமுக ஆட்சியில் முதலமைச்சர் குறை தீர்க்கும் முகாமில் 9 லட்சம் மனுக்கள் பெறப்பட்டு, 5 லட்சம் மனுக்களுக்கு தீர்வு காணப்பட்டது. அதே திட்டத்தைத்தான் திமுக அரசும் செயல்படுத்தி வருகிறது.
தேர்தல் நேரத்தில் மக்கள் அளிக்கும் கோரிக்கை மனுக்களுக்கு 100 நாளில் தீர்வு காணப்படும், திமுக ஆட்சி அமைந்ததும் உடனடியாக நீட் தேர்வு ரத்து செய்யப்படும் என பல முறை பிரசாரக் கூட்டங்களில் முதலமைச்சர் மு.க.ஸ்டாலின் கூறியிருந்தார். அதனைத்தான் நாங்கள் கேட்கிறோம். மக்களை ஏமாற்றி ஆட்சியில் அமர்ந்தவுடன் வாக்குறுதிகள் காற்றில் பறந்து விட்டன.