‘எங்களை யாரும் விலைக்கு வாங்க முடியாது’ - சவால் விடும் சேலம் அமமுக வேட்பாளர்!

சேலம்: அம்மா மக்கள் முன்னேற்றக் கழகத்தின் வேட்பாளர்களை எந்தக் கட்சியும் விலைக்கு வாங்க முடியாது என அக்கட்சியின் சேலம் நாடாளுமன்றத் தொகுதி வேட்பாளராக போட்டியிடும் எஸ்.கே.செல்வம் தெரிவித்துள்ளார்.

தமிழ்நாடு மற்றும் புதுச்சேரியில் உள்ள 40 நாடாளுமன்றத் தொகுதிகளுக்கும் ஏப்ரல் 18ஆம் தேதி ஒரே கட்டமாகத் தேர்தல் நடைபெறுகிறது.

இதில் போட்டியிடும் வேட்பாளர்கள் தங்களின் வேட்புமனுக்களை தாக்கல் செய்ய இன்றே கடைசி நாள் என்பதால், இன்று மட்டும் சேலம் மாவட்டத்தில் 18 பேர் வேட்புமனுக்களை தாக்கல் செய்துள்ளனர்.

அந்த வகையில், இன்று தனது வேட்புமனுவை தாக்கல் செய்துவிட்டு செய்தியாளர்களிடம் பேசிய அமமுக வேட்பாளர் எஸ்.கே.செல்வம்,

“எங்களுக்கு குக்கர் சின்னம் கிடைக்கவில்லை என்பது இழப்பில்லை. சொல்லப்போனால் எந்த சின்னம் எங்களுக்கு வழங்கப்பட்டாலும் வாக்காளர்கள் மத்தியில் அதை கொண்டு சேர்ப்பது எங்களுக்கு எளிதான ஒன்று.

திமுக முடிந்துபோன கட்சி. அதிமுக துரோகிகளின் கட்சி. மக்களுக்கு சேவை செய்வது என்பதே எங்களின் இலக்கு. எனவே நாங்கள் வெற்றி பெறுவோம். அமமுக வேட்பாளர்களை யாரும் விலைக்கு வாங்க முடியாது” எனத் தெரிவித்தார்.