ரயில்வே ஊழியர்களின் கல்வித்தகுதியை மேம்படுத்த கால அவகாசம்! - சு.வெங்கடேசன் எம்பி கடிதம்!

மதுரை: கருணை அடிப்படையில் வேலைக்குச் சேர்ந்த ஊழியர்களுக்கு அவர்களின் கல்வித்தகுதியை மேம்படுத்திக்கொள்ள கால அவகாசம் வழங்க வேண்டும் என ரயில்வே அமைச்சருக்கு சு.வெங்கடேசன் எம்.பி கடிதம் எழுதியுள்ளார்.

ரயில்வே ஊழியர்கள் பணியின்போது இறந்தால் குடும்பத்தில் ஒருவருக்கு கருணை அடிப்படையில் வேலை தரப்படுகிறது. இதற்கு குறைந்தபட்ச கல்வித்தகுதியாக பத்தாம் வகுப்பு இருந்து வந்த நிலையில், கடந்த 2012ஆம் 8 ஆம் வகுப்பு என தளர்வாக்கப்பட்டது. ஆனால், அவர்கள் ஐந்து ஆண்டுகளில் பத்தாம் வகுப்பு தேர்ச்சி பெற வேண்டும். பெரும்பாலும் இந்த அடிப்படையில் வேலைக்கு வந்தவர்கள், தண்டவாள பராமரிப்பு வேலையில் ஈடுபடும் சாதாரண ஊழியர்கள் ஆவர்.

இந்நிலையில் தற்போது அத்தளர்வும் விலக்கிக் கொள்ளப்பட்டு, குறைந்தபட்ச கல்வித்தகுதி 10ஆம் வகுப்பு தான் என்று உத்தரவிடப்பட்டுள்ளது. ஏற்கனவே கருணை அடிப்படையில் பணியில் அமர்த்தப்பட்ட பத்தாம் வகுப்புக்கு குறைவான கல்வித் தகுதி உடையவர்களுக்கு, மே மாதம் வரை கால அவகாசம் அளிக்கப்பட்டுள்ளது. அதற்குள் தேர்வாகவில்லை என்றால், அவர்கள் வேலை நீக்கம் செய்யப்படும் அபாயம் ஏற்பட்டுள்ளது.

இது குறித்து ரயில்வே அமைச்சருக்கு மதுரை தொகுதி நாடாளுமன்ற உறுப்பினர் சு.வெங்கடேசன் எழுதியுள்ள கடிதத்தில், ”இன்னமும் பத்தாம் வகுப்பு தேர்ச்சி பெறாத ஊழியர்கள் ஒரு சில பேரே என்பதால், ஒருமுறை விதிவிலக்கு அளித்து அனைவரையும் நிரந்தரம் செய்ய வேண்டும். அவர்களின் கிராமப்புற பின்னணியை கணக்கில் கொண்டு இதனை அளிக்க வேண்டும். ஒருவேளை அது சாத்தியமில்லை எனில் தேர்ச்சி பெற மேலும் ஓராண்டு கால அவகாசம் அளித்திட வேண்டும்” என்று எழுதியுள்ளார்.

இதையும் படிங்க:ஆர்.எஸ். பாரதி மீது பதியப்பட்ட வழக்கை ரத்துசெய்ய கோரிய வழக்கு ஒத்திவைப்பு!