சபரிமலை தீர்ப்பை மதித்து நடந்துகொள்ளுங்கள் - மதுரை ஆதீனம் பேட்டி

மதுரை: சபரிமலை தீர்ப்பை அனைத்து மக்களும் மதித்து நடக்க வேண்டுமென மதுரை ஆதீனம் கேட்டுக்கொண்டார்.

சபரிமலை கோயிலுக்குள் அனைத்து வயது பெண்களையும் அனுமதிக்கலாம் என்று கடந்தாண்டு உச்ச நீதிமன்றம் தீர்ப்பு வழங்கியது. இந்தத் தீர்ப்பை மறுஆய்வு செய்யக்கோரி உச்ச நீதிமன்றத்தில் மனுக்கள் தாக்கலானது. இந்த மனுக்களை 7 பேர் கொண்ட அரசியல் சாசன அமர்வுக்கு தலைமை நீதிபதி ரஞ்சன் கோகாய் மாற்றி உத்தரவிட்டார்.
எனினும் அவர் உச்ச நீதிமன்றத்தின் கடந்தாண்டு தீர்ப்புக்கு தடைவிதிக்கவில்லை. இந்த நிலையில் மதுரை ஆதீனம் அருணகிரி நாதர் இன்று செய்தியாளர்களைச் சந்தித்தார். அப்போது அவர் கூறியதாவது:

ஐயப்பன் மலை சம்பந்தமாக இன்றைய தினம் உச்ச நீதிமன்றத்தில் ஒரு தீர்ப்பு வழங்கப்பட்டுள்ளது. ஏற்கனவே சென்ற ஆண்டு பிப்ரவரி மாதம் வழங்கிய தீர்ப்பு தொடர்ந்து இருக்கும் என்றும் இது குறித்த தீர்ப்பை 7 நீதிபதிகள் கொண்ட அமர்வு இனி வழங்கும் என்றும் இந்தத் தீர்ப்பில் குறிப்பிடப்பட்டுள்ளது. இந்த நாட்டிலிலுள்ள அனைவருக்கும் மதுரை ஆதீனத்தின் வேண்டுகோள், இந்தத் தீர்ப்பை ஏற்றுக் கொள்ளுங்கள்.

மதித்து நடந்துகொள்ளுங்கள். ஐயப்பன் தரிசனம் செய்யும் அன்பர்கள் திருச்சி, சென்னை ஆலயங்களிலும் தரிசித்துக் கொள்ளலாம். அங்கேயும் சக்தி இருக்கிறது. எனவே உச்ச நீதிமன்றத்தின் அடுத்த தீர்ப்புக்காக அனைவருக்கும் காத்திருங்கள். பொறுமையாக இருங்கள். ஐயப்பனின் ஆசிர்வாதம் உங்களுக்கு உண்டு!இவ்வாறு மதுரை ஆதீனம் கூறினார்.

இதையும் படிங்க : மதுரை ஆதீனத்திற்கு டிடிவி எச்சரிக்கை!