சிறையில் கலவரத்தை ஏற்படுத்திய 21 கைதிகள் மீது வழக்குப்பதிவு

மதுரை மத்திய சிறையில் கலவரத்தை ஏற்படுத்தி பொருள்களைச் சேதப்படுத்தியாக 21 கைதிகள் மீது வழக்குப்பதிவு செய்யப்பட்டுள்ளது. சிறையில் பயன்படுத்தபட்ட கஞ்சா போதைப்பொருள்களை காவல் துறையினர் பறிமுதல்செய்தனர்.

மதுரை:மதுரை மத்திய சிறையில் கலவரத்தை ஏற்படுத்தி பொருள்களைச் சேதப்படுத்தியாக 21 கைதிகள் மீது வழக்குப்பதிந்து, காயமடைந்த ஒன்பது பேருக்கு சிகிச்சை அளிக்கப்பட்டுவருகிறது. சிறையில் பயன்படுத்தப்பட்ட கஞ்சா போதைப்பொருளும் பறிமுதல்செய்யப்பட்டட்து.

மதுரை அரசரடி அருகே புதுஜெயில் ரோடு சாலையில் அமைந்துள்ள மதுரை மத்திய சிறையில் 1300-க்கும் மேற்பட்ட சிறைவாசிகள் உள்ளனர். இந்நிலையில் நேற்று மதியம் சிறைக்குள் இருந்த சிறைவாசியான மதுரை மாவட்டம் கள்ளிக்குடியைச் சேர்ந்த ஆதிநாராயணன் என்பவரை, மதுரை தெப்பக்குளம் பங்கஜம் காலனியைச் சேர்ந்த சுபாஷ்சந்திரபோஸ் என்ற சிறைவாசி திடீரென சிறைக்குள் வைத்து தாக்கியுள்ளார்.

கலவரத்தில் ஈடுபட்ட கைதிகள்

இதைனையடுத்து சிறைவாசி சுபாஷ்சந்திரபோஸை சிறைக் காவலர்கள் விசாரணை நடத்தியுள்ளனர். இதனைப் பார்த்த சிறைவாசிகள் சிலர் காவலர் சிறைவாசியைத் துன்புறுத்துவதாக நினைத்துக்கொண்டு சிறைவாசிகள் சிலர் திடீரென சிறை வளாகத்திற்குள் இருந்த பொருள்களைச் சேதப்படுத்தியும், சிறைச்சுவர் மீது ஏறி நின்று சாலைகளில் கற்களை வீசி எறிந்தும் கலவரத்தில் ஈடுபட்டனர்.

மேலும் சில சிறைவாசிகள் தங்களைத் தாங்களே பிளேடு, கண்ணாடிகளால் தாக்கிக் கொண்டனர். இந்நிலையில் இது குறித்து சிறை அலுவலர்கள் நடத்திய விசாரணையில் திருச்சியைச் சேர்ந்த சிறைவாசியான ஜெகன் தூண்டுதலின்பெயரில் சுபாஷ்சந்திரபோஸ் ஆதிநாரயாணனை முன்விரோதம் காரணமாகத் தாக்கியது தெரியவந்துள்ளது.

பதுக்கிய கஞ்சா பறிமுதல்

இதனையடுத்து சிறைவாசியைத் தாக்கியதாக ஜெகன், சுபாஷ்சந்திரபோஸ் ஆகிய இருவர் மீதும் சிறை அலுவலர் அளித்த புகாரின்பெயரில் கரிமேடு காவல் துறையினர் வழக்குப்பதிவு செய்துள்ளனர். மேலும் சிறைவாசி ஜெகன் கஞ்சாவைப் பதுக்கிவைத்து பயன்படுத்தியதாகவும் வழக்குப்பதிவு செய்து அவரிடம் இருந்த 30 கிராம் கஞ்சா பறிமுதல்செய்யப்பட்டுள்ளது.

இதனிடையே சிறை வளாகத்தில் கலவரத்தை ஏற்படுத்தும் வகையில் செயல்பட்டு சிறை வளாகத்திற்குள் இருந்த பொருள்களைச் சேதப்படுத்தியதாக சிறை அலுவலர் அளித்த மற்றொரு புகாரின் அடிப்படையிலும் 19 சிறைவாசிகள் மீதும் கரிமேடு காவல் துறையினர் வழக்குப்பதிவு செய்துள்ளனர்.

மேலும் சிறை வளாகத்தில் நடைபெற்ற கலவரத்தின்போது தங்களைத் தாங்களாகவே காயம் ஏற்படுத்திக்கொண்ட ஒன்பது சிறைவாசிகளுக்குச் சிகிச்சை அளிக்கப்பட்டுவருகிறது.

மதுரை மத்திய சிறைக்குள் சிறைவாசிகளுக்கு இடையே ஏற்பட்ட மோதல் தொடர்பாக 21 சிறைவாசிகள் மீது பல்வேறு பிரிவுகளின்கீழ் வழக்குப்பதிவு செய்யப்பட்டுள்ளதோடு சிறைவாசிகளின் பாதுகாப்பை உறுதிபடுத்தும் வகையில் தொடர்ந்து சோதனை, ரோந்துப் பணியில் காவலர்கள் ஈடுபடுத்தப்படுவார்கள் எனவும் சிறைத் துறை தரப்பில கூறப்பட்டுள்ளது.

இதையும் படிங்க:டிச 31 இரவு 12 மணிக்கு மேல் சென்னையில் வாகனப் போக்குவரத்திற்குத் தடை : சென்னை காவல் துறை