மதுரையில் ரூ.42.50 லட்சம் மதிப்பிலான தங்கம் பறிமுதல்!

துபாயிலிருந்து மதுரைக்கு வந்த ஏர் இந்தியா விமானத்தில், ரூ.42.50 லட்சம் மதிப்பிலான கடத்தல் தங்கம் பறிமுதல்செய்யப்பட்டு இரண்டு பெண்கள் கைதுசெய்யப்பட்டனர்.

துபாயிலிருந்து மதுரை வரும் ஏர் இந்தியா எக்ஸ்பிரஸ் விமானத்தில் தங்கம் கடத்திவரப்படுவதாக சுங்கத் துறை அலுவலர்களுக்குத் தகவல் கிடைத்தது. அந்தத் தகவலின் அடிப்படையில், அலுவலர்கள் மதுரை வந்த 141 விமான பயணிகளிடம் சோதனையில் ஈடுபட்டனர்.

இந்தச் சோதனையில், பெண்கள் இருவரின் உடைமைகளில் 850.80 கிராம் கடத்தல் தங்கம் இருப்பது கண்டுபிடிக்கப்பட்டது. அவற்றைப் பறிமுதல்செய்த அலுவலர்கள் அவர்களிடம் விசாரணை நடத்தினர்.

அதில், அவர்கள் இருவரும் மதுரையைச் சேர்ந்த கனகவல்லி, சாய்நம்பு என்பது தெரியவந்தது. தற்போது அவர்கள் கைதுசெய்யப்பட்டனர். கடத்திவரப்பட்ட தங்கத்தின் மதிப்பு ரூ.42.50 லட்சம் எனத் தெரிவிக்கப்பட்டுள்ளது.

இதையும் படிங்க:சென்னை விமான நிலையத்தில் 1.26 கிலோ தங்கம் பறிமுதல் - 8 பேர் கைது