வழக்கம்போல் நேரடி விசாரணை: மனுவைத் தள்ளுபடிசெய்த நீதிமன்றம்

மீண்டும் வழக்கம்போல் நீதிமன்றத்தில் நேரடியாக வழக்கு விசாரணைகளை நடத்த உரிய உத்தரவு பிறப்பிக்க வேண்டும் எனக் கோரிய பொதுநல வழக்கை உயர் நீதிமன்ற மதுரைக் கிளை தள்ளுபடி செய்துள்ளது.

மதுரை: வழக்கறிஞர் உக்கிரபாண்டி என்பவர் உயர் நீதிமன்ற மதுரைக் கிளையில் பொதுநல மனுவைத் தாக்கல்செய்திருந்தார். அதில், "கரோனா தொற்றின் காரணமாக 2020 ஏப்ரல் மாதம் முதல் ஊரடங்கு தொடர்ந்து நடைமுறைப்படுத்தப்பட்டுவருகிறது.

பின்பு படிப்படியாகத் தளர்வுகள் நடைமுறைப்படுத்தப்பட்டன. இந்த நிலையில் உயர் நீதிமன்ற மதுரைக் கிளையில் காணொலி மூலம் வழக்குகள் விசாரிக்கப்படுகின்றன. இந்தப் பணி சிறப்பாக நடைபெற்றுக் கொண்டிருக்கிறது. நீதிமன்றத்திற்குள் வழக்கறிஞர்கள், மனுதாரர்கள் அனுமதிக்கப்படுவதில்லை. அதேபோன்று வழக்கறிஞர்கள் அறையும் திறக்கப்படவில்லை.

ஆன்லைன் வழக்கு விசாரணையால் இளம் வழக்கறிஞர்கள் மிகவும் பாதிப்புக்கு உள்ளாகின்றனர். அவர்கள் உயர் நீதிமன்றத்தில் உள்ள வழக்கறிஞர்கள் அறையில் அமர முடியாமல் உள்ளனர். வழக்குத் தொடர்பான ஆவணங்களைப் பெற முடியாமலும் மிகுந்த சிரமத்திற்கு உள்ளாகின்றனர்.

இந்தச் சூழலில் வழக்கறிஞர்கள் அறையும் மூடப்பட்டிருப்பதால், உயர் நீதிமன்ற வளாகத்தில் உள்ள தேநீர்க் கடைகள் உள்ளிட்டவை அருகே நின்று மனுக்களையும், ஆவணங்களையும் வழங்கிவருகின்றனர்.

இதனால் இந்தப் பகுதியில் கூட்டம் அதிகமாக உள்ளது, எனவே உயர் நீதிமன்ற மதுரைக் கிளையில் மீண்டும் வழக்கம்போல் நீதிமன்றத்தில் நேரடியாக வழக்கு விசாரணைகளை நடத்த உரிய உத்தரவு பிறப்பிக்க வேண்டும்.

மேலும் உயர் நீதிமன்ற மதுரைக் கிளை வளாகத்தில் உள்ள வழக்கறிஞர்கள் அறைகளையும் திறந்துவிட உத்தரவிட வேண்டும்" என்று கூறியிருந்தார்.

இந்த மனு சென்னை உயர் நீதிமன்ற தலைமை நீதிபதி சஞ்ஜிப் பானர்ஜி, நீதிபதி எஸ். ஆனந்தி அமர்வில் விசாரணைக்கு வந்தது. அப்போது நீதிபதிகள், தற்போதைய நிலையில் எந்த உத்தரவும் பிறப்பிக்க வாய்ப்பில்லை எனக் கூறி மனுவைக் தள்ளுபடிசெய்தனர்.