ஈரோடு ஜல்லிக்கட்டு: 14 காளைகளை அடக்கிய மதுரை இளைஞருக்கு பைக் பரிசு!

ஈரோடு: பவளத்தாம்பாளையம் ஜல்லிக்கட்டுப் போட்டியில் 14 காளைகளை அடக்கி மதுரையைச் சேர்ந்த கார்த்திக் என்னும் மாடுபிடி வீரர் சிறந்த வீரருக்கான முதல் பரிசையும், சிறந்த காளையாக சிவகங்கை மாவட்டத்தைச் சேர்ந்த தவமணி என்பவரது காளையும் வென்றது.

ஈரோடு மாவட்டம் பவளத்தாம்பாளையத்தில் ஜல்லிக்கட்டுப் பேரவை மற்றும் தனியார் அமைப்பினர் சார்பில் இரண்டாவது ஆண்டாக ஜல்லிக்கட்டுப் போட்டி நடைபெற்றது. அமைச்சர்கள் கே.ஏ.செங்கோட்டையன், பி.தங்கமணி மற்றும் கே.சி.கருப்பணன் ஆகியோர் இந்த போட்டியை கொடியசைத்துத் தொடங்கி வைத்தனர். இப்போட்டியில் தகுதியுள்ள 322 காளைகளும், 222 மாடுபிடி வீரர்களும் பங்கேற்றனர்.

வாடிவாசலில் சீறிப் பாய்ந்த காளைகளை அடக்கிய சிறந்த மாடுபிடி வீரர்களுக்கும் வீரர்களிடம் சிக்காமல் ஆட்டம் காட்டிய காளைகளுக்கும் தங்கக் காசு, செல்போன்கள், கன்றுக் குட்டிகள் உள்ளிட்ட பல்வேறு பரிசுகள் வழங்கப்பட்டன. காலை 8.15 மணிக்குத் தொடங்கி மதியம் 2.45 வரையில் விறுவிறுப்புடன் நடைபெற்ற இப்போட்டியில் ஆரம்பம் முதல் கடைசி வரை மாடுபிடி வீரர்கள் மிகுந்த உற்சாகத்துடனும், ஆர்வத்துடனும் போட்டி போட்டுக் கொண்டு காளைகளை அடக்கிப் பரிசுகளை வென்றனர்.

போட்டியின் போது காளைகளை அடக்க முயன்ற 10க்கும் மேற்பட்ட மாடுபிடி வீரர்கள் காயமடைந்து உடனடியாக சிகிச்சைக்காக ஆம்புலன்ஸ் மூலம் மருத்துவமனைக்கு கொண்டுச் செல்லப்பட்டனர். மேலும் கடும் நெரிசல் காரணமாக 4 பார்வையாளர்கள் மயக்கமடைந்து மீட்கப்பட்டு மருத்துவமனைக்கு அழைத்துச் செல்லபட்டு சிகிச்சை வழங்கப்பட்டது.

இந்தப் போட்டியில் 14 காளைகளை அடக்கி மதுரையைச் சேர்ந்த கார்த்திக் என்பவர் முதல் பரிசாக இருசக்கர வாகனத்தை வென்றார். இவர் கடந்த ஆண்டு நடைபெற்ற போட்டியிலும் முதல் பரிசு வென்றவர் என்பது குறிப்பிடத்தக்கது. 11 காளைகளை அடக்கிய நத்தம் பகுதியைச் சேர்ந்த மாடுபிடி வீரர் கார்த்திக் இரண்டாவது பரிசையும், 8 காளைகளை அடக்கிய நாமக்கல் மாவட்டத்தைச் சேர்ந்த சபரி என்பவர் மூன்றாவது பரிசையும் பெற்றார்.

அதேபோல் மாடுபிடி வீரர்கள் முயற்சித்தும் தொடக்கூட முடியாமல் துள்ளி ஓடிய சிவகங்கை மாவட்டத்தைச் சேர்ந்த காளை உரிமையாளர் தவமணி என்பவருக்குச் சிறந்த காளைக்கான முதல் பரிசும், மணப்பாறையைச் சேர்ந்த ராஜா என்பவரின் காளைக்கு இரண்டாவது பரிசும், உய்ப்புறம் பகுதியைச் சேர்ந்த ராஜா என்பவரின் காளைக்கு மூன்றாவது பரிசும் வழங்கப்பட்டது.

இதையும் படிங்க: