ஈரோடு அருகே காட்டாற்று வெள்ளத்தில் சிக்கிய அரசுப்பேருந்து!

ஈரோடு அருகே நெய்தாளபுரத்தில் காட்டாற்று வெள்ளத்தைக் கடக்க முயன்ற அரசுப்பேருந்து வெள்ளத்தில் சிக்கியதைத் தொடர்ந்து ஒரு மணிநேரப் போராட்டத்திற்குப் பிறகு மீட்கப்பட்டது.

ஈரோடு:சத்தியமங்கலம் புலிகள் காப்பகம், தாளவாடி மலைப்பகுதியில் உள்ள தலமலை, தொட்டபுரம், முதியனூர், நெய்தாளபுரம் உள்ளிட்ட பகுதிகளில் பெய்த கனமழை காரணமாக பல ஓடைகளில் பெருக்கெடுத்து ஓடுகிறது. இதனால், நெய்தாளபுரத்தில் காட்டாற்று வெள்ளம் தரைபாலத்தை மூழ்கடித்தது.

இந்நிலையில், இன்று (செப்.6) தாளவாடியில் இருந்து 25 பயணிகளுடன் சென்ற பேருந்து ஒன்று நெய்தாளபுரம் தரைப்பாலத்தில் ஓடும் காட்டாற்று வெள்ளத்தைக் கடக்க முயன்றபோது, வெள்ளத்தில் சிக்கியது. தொடர்ந்து இதுகுறித்து ஓட்டுநர், நடத்துநர் தாளவாடி அரசுப் போக்குவரத்து பணிமனைக்குத் தகவல் தெரிவித்தனர்.

பின் அங்கு வந்த பணியாளர்கள் பேருந்தை மற்றொரு வாகனம் மூலம் கயிறு கட்டி சுமார் ஒரு மணிநேரத்திற்குப் பிறகு மீட்டனர். அதன் பிறகு போக்குவரத்துக் கழக பணியாளர்கள் இன்ஜினில் புகுந்த நீரை அகற்றி, பழுது நீக்கியதை அடுத்து அப்பேருந்து சத்தியமங்கலம் நோக்கி புறப்பட்டது. இதனால் அப்பகுதியில் பரபரப்பு ஏற்பட்டது.

இதையும் படிங்க: பாரத் பயோடெக்கின் உள்நாசி வழியாக செலுத்தப்படும் கரோனா தடுப்பு மருந்துக்கு அனுமதி