பக்ரீத் பண்டிகை: கோபிசெட்டிபாளையம் சந்தையில் செம்மறி ஆடுகள் விற்பனை ஜோர்

கோபிச்செட்டிபாளையம் அருகே மொடச்சூர் சந்தையில் பக்ரீத் பண்டிகை காரணமாக செம்மறி ஆடுகள் விற்பனை ஜோராக நடந்தது.

ஈரோடு: கோபிசெட்டிபாளையம் அடுத்துள்ள மொடச்சூரில் வாரந்தோறும் சனிக்கிழமை ஆட்டுச்சந்தை நடைபெறும். இந்த வாரம் பக்ரீத் பண்டிகையை முன்னிட்டு நேற்று (ஜூலை 17) அதிகாலை முதலே மொடச்சூர் ஆட்டு சந்தையில் கூட்டம் அதிகளவில் காணப்பட்டது.

ரக ரகமாக குவிந்த ஆடுகள்

கரோனா பொதுமுடக்கத் தளர்வால் நீண்ட நாட்களுக்கு பின் மீண்டும் ஈரோடு, திருப்பூர், கோயம்புத்தூர் உள்ளிட்ட பல்வேறு இடங்களில் நூற்றுக்கணக்கானோர் வேன்கள் மூலம் செம்மறி ஆடு வாங்க குவிந்தனர்.

கோபிசெட்டிபாளையம், சிறுவலூர், கொளப்பலூர் உள்ளிட்ட பல்வேறு பகுதிகளில் இருந்து செம்மறி ஆடு, வெள்ளாடு; கர்நாடக பர்கூர்,மைசூர் மலை பகுதிகளிலிருந்து கருப்பு ஆடு என பல்வேறு வகையான ஆடுகள் விற்பனைக்கு வந்தன.

'மவுஸ்' ஏறிய செம்மறி ஆடுகள்

பக்ரீத் பண்டிகைக்கு இன்னும் மூன்று தினங்களே உள்ள நிலையல் ஆடுகள் விற்பனை சூடுபிடித்துள்ளது. மொடச்சூர் வாரச்சந்தையில் இன்று வெள்ளாடுகளை விட அதிமாக செம்மறி ஆடுகளே விற்பனைக்கு கொண்டு வரப்பட்டிருந்தது.

அதிகமாக செம்மறி ஆடுகளே விற்பனை செய்யப்பட்டு வந்ததால், தங்கள் கொண்டுவந்த நன்கு வளர்ந்த செம்மறி ஆடுகளுக்கு 25 ஆயிரம் முதல் 35 ஆயிரம்வரை விலை நிர்ணயம் செய்து விற்பனையில் ஈடுபட்டனர். இந்த வார சந்தையில் நேற்று ஒரு நாள் மட்டும் ரூ.50 லட்சம் வரை ஆடுகள் விற்பனையானது.