ஈரோடு மாவட்டம் சத்தியமங்கலம் ஆசனூர் வனப்பகுதியின் புலிகள் காப்பகத்தில் ஏராளமான யானைகள் உள்ளன. அந்த அடர்ந்த வனப்பகுதியின் மத்தியில் தமிழ்நாடு-கர்நாடக இடையே மைசூர்- பெங்களூரு தேசிய நெடுஞ்சாலை உள்ளதால் அங்கு நாள்தோறும் ஆயிரக்கணக்கான வாகனகள் வந்துசெல்கின்றன.
காட்டு யானைகள் தீவனம், குடிநீர் தேடி அப்பகுதியில் முகாமிட்டுவருவது வழக்கம். இந்நிலையில் ஆண் யானை ஒன்று ஆசனூர் சாலையோரத்திலிருந்த மரக்கிளைகளை முறித்து சாப்பிட்டபடி நீண்ட நேரம் அங்கு நின்று கொண்டிருந்தது.
இதனால் சாலையை கடப்பதற்கு வாகன ஓட்டிகள் நீண்ட நேரமாக காத்திருந்தனர். ஆனால் யானை சாப்பிட்டுவிட்டு சாலையில் அங்கும் இங்குமாக சுற்றித் திரிந்ததால் வாகன ஓட்டிகள் யானையை விரட்ட தங்கள் இருசக்கர வாகனம் மூலம் ஒலியெழுப்பியுள்ளனர்.
இதில் மிரண்ட யானை வாகனங்களை நோக்கி வந்ததால், மக்கள் அதற்கு அஞ்சி வாகனங்களை வந்த திசையிலேயே பின்னோக்கி ஓட்டிச் சென்றுள்ளனர்.
இது குறித்து தகவல் அறிந்த வனத் துறையினர் சம்பவம் இடத்திற்கு வந்து யானையை காட்டுக்குள் விரட்டிய பின் யானைகள் சாலையோரம் நடமாடுவதால் அவைகளுக்கு இடையூறு செய்ய வேண்டாம் என வனத் துறை அலுவலர்கள் பொதுமக்களிடம் கேட்டுக்கொண்டனர்.
