தொண்டாமுத்தூரை அடுத்த தேவராயபுரம் பகுதியில் கடந்த வாரம் திமுக சார்பில் மக்கள் கிராம சபை கூட்டம் நடைபெற்றது. மு.க.ஸ்டாலின் நடைபெற்ற இக்கூட்டத்தில், அதிமுகவை சேர்ந்த பட்டியலினப் பெண்ணான பூங்கொடி என்பவர் கலந்து கொண்டு, ஸ்டாலினிடம் வாக்குவாதத்தில் ஈடுபட்டார். இதனையடுத்து அவரை கூட்டத்தில் இருந்து வெளியேற்ற முயன்றபோது அவர் மீது தாக்குதல் நடத்தப்பட்டதாக தகவல் வெளியானது.
பின்னர் பூங்கொடி மற்றும் அவருக்கு ஆதரவாக வந்த முனி, ராமன், மகேஸ்வரி ஆகியோர் அனைவரும் கோவை அரசு மருத்துவமனையில் சிகிச்சைக்காக அனுமதிக்கப்பட்டனர். இந்நிலையில் ஆதித்தமிழர் மக்கள் கட்சியின் தலைவர் கல்யாணசுந்தரம் என்பவர், தாழ்த்தப்பட்ட பெண்கள் மீது நடத்தப்பட்ட தாக்குதல் தொடர்பாக விசாரணை நடத்தி எஸ்.சி எஸ்.டி பிரிவில் வழக்குப்பதிவு செய்யக்கோரி தேசிய எஸ்.சி எஸ்.டி ஆணையத்தில் மனு அளித்தார்.