பொள்ளாச்சி பாலியல் வழக்கு! - அமைச்சர் வேலுமணியையும் விசாரிக்க திமுக வலியுறுத்தல்!

கோவை: பொள்ளாச்சி பாலியல் வழக்கு தொடர்பாக அமைச்சர் எஸ்.பி.வேலுமணியிடமும் சிபிஐ விசாரணை மேற்கொள்ள வேண்டும் என திமுக சுற்றுச்சூழல் அணி மாநில பொறுப்பாளர் கார்த்திகேய சிவசேனாபதி வலியுறுத்தியுள்ளார்.

கோவை மாவட்டம் பொன்னான்டம்பாளையம் கிராமத்தில் 4 உள்ளாட்சி அமைப்புகள் வருவதால், அதனை ஒரே உள்ளாட்சி அமைப்பின் கீழ் கொண்டு வரக்கோரி அக்கிராம மக்கள் இன்று காலவரையற்ற உண்ணாவிரதப் போராட்டம் மேற்கொண்டனர். அவர்களை சந்தித்து ஆதரவு தெரிவித்த திமுக சுற்றுச்சூழல் அணி மாநிலப் பொறுப்பாளர் கார்த்திகேய சிவசேனாபதி, கிராம மக்களின் கோரிக்கை விரைவில் நிறைவேற்றப்படும் என உறுதியளித்தார்.

இதனையடுத்து செய்தியாளர்களிடம் பேசிய அவர், “அதிமுக அரசு கடந்த 10 ஆண்டுகளுக்கு மேலாக பெண்களுக்கும் மனிதகுலத்திற்கும் எதிரான அரசாக உள்ளது. பொள்ளாச்சி கூட்டு பாலியல் வழக்கை திமுகவினர் தான் முதன் முதலில் வெளிப்படுத்தி போராட்டம் மேற்கொண்டனர். தற்போது பொள்ளாச்சி அதிமுக மாணவர் அணி நகரச் செயலாளர் அருளானந்தம் சிபிஐயால் கைது செய்யப்பட்டுள்ளது வரவேற்கத்தக்கது. காவல்துறை விசாரணை மேற்கொண்டு இருந்தால் இந்த கைது நடந்திருக்காது.

அருளானந்தம் கடந்த 2 நாட்களுக்கு முன்பாக உள்ளாட்சித்துறை அமைச்சர் எஸ்.பி.வேலுமணியை சந்தித்துள்ளார். எனவே, இவ்வழக்கு தொடர்பாக அமைச்சர் எஸ்.பி.வேலுமணியிடமும் சிபிஐ அதிகாரிகள் விசாரணை மேற்கொள்ள வேண்டும். பெண்களுக்கு எதிராக குற்றமிழைத்தோரிடம் அமைச்சர் எப்படி உடந்தையாக இருந்தார் என்பதையும் சிபிஜ கண்டுபிடிக்க வேண்டும். பசு மாட்டிற்கும் எருமை மாட்டிற்கும் வித்தியாசம் தெரியாத கால்நடை பராமரிப்புத்துறை அமைச்சர் உடுமலை ராதாகிருஷ்ணன், நாட்டு மாடுகளை அழிக்கும் நோக்கத்தில் செயல்பட்டு வருகிறார். இத்துறையில் நடந்துள்ள பல ஆயிரம் கோடி மோசடி குறித்தும் விசாரணை நடத்த வேண்டும்” என வலியுறுத்தினார்.

இதையும் படிங்க:பொள்ளாச்சி பாலியல் வழக்கு; அதிமுக பிரமுகர் உள்பட மேலும் மூவர் கைது!