"குடிக்கிறதையா...தட்டிக்கேட்குறா?" - மனைவியைக் கொன்றுவிட்டு தற்கொலை செய்த காவலர்!

சென்னை: குடிப்பழக்கத்தைத் தட்டிக்கேட்ட மனைவியை கணவன் வெட்டிக்கொலை செய்து, தூக்கிட்ட சம்பவம் அப்பகுதியில் சோகத்தை ஏற்படுத்தியுள்ளது.

புதுவண்ணாரப்பேட்டை காவல்நிலையத்தில் தலைமைக் காவலராகப் பணியாற்றி வந்தவர் நரேஷ். அவரது மனைவி ஜெயஸ்ரீ. அவர்களுக்கு தருண் (வயது 7) என்ற மகன் உள்ளார். நரேசும், ஜெயஸ்ரீயும் பெரம்பூர் செம்பியத்தில் உள்ள காவலர் குடியிருப்பில் வசித்து வந்தனர். மகன் தருணை புழல் புத்தகரத்தில் உள்ள ஜெயஸ்ரீயின் தாய் ஜமுனா வீட்டில், தங்க வைத்து அங்குள்ள பள்ளியில் சேர்த்திருந்தனர். மகனைப் பார்க்க அடிக்கடி புத்தகரத்துக்குச் சென்று வந்தனர்.

நரேசுக்கு குடிப்பழக்கம் இருந்ததால் அதை ஜெயஸ்ரீ கண்டித்தும் வந்தார். இக்குடிப்பழக்கத்தினால் தம்பதியினர் இடையே அடிக்கடி தகராறும் ஏற்பட்டு வந்தது. இந்த நிலையில் நேற்று காலை அவர்களிடையே வாய் தகராறு ஏற்பட்டது. இதனால் ஜெயஸ்ரீ கோபித்துக் கொண்டு புத்தகரத்தில் உள்ள தனது தாய் வீட்டுக்குச் சென்றிருக்கிறார். பின்னர் ஜெயஸ்ரீ தனது தாய் ஜமுனா, மகன் தருண் ஆகியோருடன் வியாசர்பாடி சர்மா நகரில் உள்ள தாய்மாமன் சரவணன் வீட்டுக்குச் சென்றுள்ளார். மனைவி, மகனுடன், சரவணன் வீட்டுக்குச் சென்று இருப்பதை அறிந்த நரேஷ் அங்கு சென்று இனிமேல் தகராறு செய்ய மாட்டேன் என்று மனைவியிடம் சமாதானம் செய்தார். பின்னர் ஜெயஸ்ரீ, தருண் ஆகியோரை புத்தகரத்தில் உள்ள மாமியார் வீட்டுக்கு நரேஷ் அழைத்துச் சென்றிருக்கிறார். அப்போது இரவு அவர்களுக்கிடையே மீண்டும் தகராறு ஏற்பட்டது. இதில் ஆத்திரம் அடைந்த நரேஷ் கத்தியால் ஜெயஸ்ரீயை சரமாரியாக குத்தினார். இதனால், ஜெயஸ்ரீ சம்பவ இடத்திலேயே உயிரிழந்தார்.

பின்னர் நரேஷ் படுக்கை அறையில் உள்ள மின்விசிறியில் தூக்குபோட்டு தற்கொலை செய்து கொண்டார். இதற்கிடையே சரவணன்; ஜெயஸ்ரீ, நரேஷ் ஆகியோரின் செல்போனைத் தொடர்பு கொண்டார். ஆனால் இருவரும் போனை எடுக்காததால் சந்தேகம் அடைந்து புத்தகரத்தில் உள்ள வீட்டுக்கு சரவணன் வந்து பார்த்தபோது ஜெயஸ்ரீ ரத்த வெள்ளத்திலும், நரேஷ் தூக்கில் தொங்கிய நிலையிலும் பிணமாக கிடப்பதைக் கண்டு அதிர்ச்சி அடைந்தார். இது குறித்து தகவல் அறிந்த புழல் போலீசார் சம்பவ இடத்துக்கு வந்து இருவரின் உடலையும் கைப்பற்றி மருத்துவமனைக்கு அனுப்பி வைத்தனர்.

நரேஷின் குடிப்பழக்கத்தை ஜெயஸ்ரீ அடிக்கடி கண்டித்து வந்ததால், இருவருக்கும் இடையே தகராறு ஏற்பட்டு வந்தது. மேலும் இருவரும் ஒருவர் மீது ஒருவர் நடத்தையில் சந்தேகம் ஏற்பட்டு சண்டை போட்டு வந்தனர். நேற்று இரவு மனைவியை சமாதானப்படுத்தி வீட்டுக்கு அழைத்து வந்த நரேஷ் மது குடிக்க முயன்றுள்ளார். இதனை ஜெயஸ்ரீ கண்டித்ததால் மீண்டும் ஆத்திரம் அடைந்த நரேஷ் கத்தியால் ஜெயஸ்ரீயைக் குத்தி கொன்றுவிட்டுத் தானும், தற்கொலை செய்துள்ளார். இதுகுறித்து போலீசார் வழக்குப்பதிவு செய்து விசாரணை நடத்தி வருகிறார்கள்.