‘வக்கீல் கிட்டயேவா...!’ - சீறிய போதை வழக்கறிஞர்: காணொலி வைரல்

சென்னை: நேற்று முன்தினம் இரவு வாகன சோதனையில் ஈடுபட்டிருந்த போக்குவரத்துக் காவலர்களை குடிபோதையிலிருந்த வழக்கறிஞர் அடிக்க முயற்சிக்கும் காணொலி காட்சிகள் வெளியாகி பரபரப்பை ஏற்படுத்தியுள்ளது.

பாண்டி பஜார் காவல் நிலையம் பின்புறம் உள்ள சாலையில், போக்குவரத்துக் காவல் உதவி ஆய்வாளர் சேகர் வாகன சோதனையில் ஈடுபட்டிருந்தார். அப்பொழுது அந்த வழியாக தலைக்கவசம் அணியாமல், குடிபோதையில் இருசக்கர வாகனத்தில் மனைவியுடன் ஒரு நபர் வந்துள்ளார்.

தலைக்கவசம் அணியாமலும் அளவுக்கு அதிகமாகக் குடிபோதையில் இருந்ததாலும் போக்குவரத்து காவலர்கள் அவரை சோதனை செய்தனர். இதனால் ஆத்திரமடைந்த அந்த நபர் உதவி ஆய்வாளர், காவலர் ஆகியோரை அடிக்க முயற்சிக்கும் காணொலிக் காட்சிகள் தற்போது வெளியாகியுள்ளன.

அதில், “வக்கீலயே அடிக்க வர்றியா” என்று காவல் துறையினரை மிரட்டும் விதத்தில் பேசியிருக்கிறார் அந்த நபர். இது குறித்து பாண்டிபஜார் காவல் துறையினர் கண்காணிப்பு படக்கருவியின் பதிவுகள் மூலம் விசாரணை மேற்கொண்டுவருகின்றனர்.